وزیراعظم عمران خان کے ڈیجیٹل پاکستان منصوبے کی سربراہی کرنے والی تانیہ ایدروس گوگل سے استعفیٰ دے کر پاکستان پہنچ گئیں ، واضح اعلان کر دیا

وزیراعظم عمران خان کے ڈیجیٹل پاکستان منصوبے کی سربراہی کرنے والی تانیہ ...
وزیراعظم عمران خان کے ڈیجیٹل پاکستان منصوبے کی سربراہی کرنے والی تانیہ ایدروس گوگل سے استعفیٰ دے کر پاکستان پہنچ گئیں ، واضح اعلان کر دیا

  



اسلام آباد(ڈیلی پاکستان آن لائن )وزیراعظم عمران خان آج ڈیجیٹل پاکستان کے منصوبے کا افتتاح کرنے جارہے ہیں اور اس کی سربراہی تانیہ ایدروس کریں گی جو کہ گوگل کے سینئر ایگزیکٹو کے عہدے سے استعفیٰ دے کر پاکستان پہنچ گئی ہیں ۔

نجی ٹی وی اے آر وائے نیوز کے مطابق گوگل کی سینئر پاکستانی ایگزیکٹو تانیہ ایدروس مستعفیٰ ہو کر سنگا پور سے پاکستان پہنچ گئی ہیں ، جو کہ پاکستان کے پہلے ڈیجیٹل وژن کی سربراہی کریں گی ۔ان کا کہناتھا کہ میں 20 سال سے بیرون ملک مقیم تھی اور پاکستان کے لیے کچھ کرنا چاہتی تھی، جب یہ حکومت آئی تو لوگوں کو محسوس ہوا ملک جا کر کچھ کرنا چاہیے۔انہوں نے بتایا کہ وزیر اعظم عمران خان اور جہانگیر ترین سے اہم رابطے ہوئے، حکومت نے ڈیجیٹلائزیشن کے انقلابی منصوبے سے آگاہ کیا، منصوبے کے تحت 5 اہم مرحلوں پر کام تیز کیا جائے گا، عوام کی انٹرنیٹ تک رسائی اور روابط کو فروغ دیا جائے گا۔

ان کا کہناتھا کہ انٹر نیٹ کی رسائی ہر پاکستانی کا بنیادی حق ہے ، ملک میں ڈیجیٹل انفرا اسٹرکچر قائم کیا جائے گا تاکہ کام تیز اور بہتر ہو، ڈیجیٹل انفرا اسٹرکچر بنانا حکومت کا کام ہے، وزیر اعظم عمران خان کا وژن ہے کہ ڈیجیٹل اور ٹیکنالوجی کی طرف جائیں، پاکستان کی 70 ملین آبادی انٹرنیٹ استعمال کر رہی ہے، پاکستان میں ڈیجیٹلائزیشن کے شعبے میں انقلاب لایا جا سکتا ہے۔تانیہ ایدروس کا کہنا تھا ای گورنمنٹ سے حکومتی فیصلوں کو پیپرلیس بنایا جائے گا، عوام کو چھوٹی چیزوں کے لیے لائنوں میں کھڑا کر دیا جاتا ہے، فنگر پرنٹس کے باوجود لائنوں میں کھڑا رکھنے کا جواز نہیں، شہری کی شناخت کو ڈیجیٹل طریقے سے استعمال کیا جائے گا، ڈیجیٹل اسکلنگ سے نوجوانوں کو معیاری اسکلز ملیں گی، کاروبار کے لیے بینکنگ نظام، سرمایہ کاروں کو سازگار ماحول دیں گے۔

مزید : قومی