میجر لاریب حسن کے قاتل گرفتار،ملزموں کا تعلق کس ملک سے ہے اور اُنہوں نے کس وجہ سے قتل کیا ؟سنسنی خیز انکشاف سامنے آ گیا

میجر لاریب حسن کے قاتل گرفتار،ملزموں کا تعلق کس ملک سے ہے اور اُنہوں نے کس ...
میجر لاریب حسن کے قاتل گرفتار،ملزموں کا تعلق کس ملک سے ہے اور اُنہوں نے کس وجہ سے قتل کیا ؟سنسنی خیز انکشاف سامنے آ گیا

  



اسلام آباد(ڈیلی پاکستان آن لائن)اسلام آباد پولیس نےگذشتہ مہینےسیکٹرجی نائن میں قتل ہونے والے پاک  فوج کے میجر لاریب  حسن کے قاتلوں کو گرفتار کر  لیا ہے،قاتل افغان شہری ہیں  اور اُنہوں   نے دوران   ڈکیتی مزاحمت پر  میجر لاریب حسن کو گولیاں مار دی تھیں۔

نجی ٹی وی  کے مطابق آئی جیاسلام آبادپولیس عامر ذوالفقارخان نےکہا ہے کہ پاک فوج کےایس ایس جی کمانڈو میجرلاریب حسن گل کےقتل میں ملوث دونوں ملزمان گرفتار کر لیے ہیں،ملزمان  افغان شہری ہیں اور اُنہوں نے دوران ڈکیتی مزاحمت پر میجر لاریب کو  گولیاں مار کر قتل کر دیا تھا ۔

آئی جی عامر ذوالفقار خان نے کہا کہ گذشتہ   ماہ 22  نومبر  کو  میجر لاریب  کے قتل کا واقع پیش آیا،معاملے کی تفتیش میں 25 افسران لگے رہے اور دن رات کی مسلسل محنت کے  بعد دونوں قاتلوں کو گرفتار کرلیا ہے۔ملزمان نے پولیس کو بیان ریکارڈ کراتے ہوئے کہا ہے کہ  کراچی کمپنی میں واقع پارک کے قریب اِن کی موٹر سائیکل کا ٹائر پنکچر ہوا تو انہوں نے ڈکیتی کا ارادہ کر لیا۔ملزمان کے مطابق میجر لاریب اور  ایک خاتون پارک میں واک کر رہے تھے،اُنہوں نے میجر لاریب کے سر پر اسلحہ رکھ  کر  پیسے اور موبائل چھیننے کی کوشش کی جس پر میجر  لاریب نے مزاحمت کی توہم نے گولی چلا کراُنہیں قتل کر دیا، ملزمان نے اس قبل جی 10 میں ایک نوجوان سے نقدی اور موبائل  چھیننے کا بھی اعتراف کر لیا ہے۔

مزید : علاقائی /اسلام آباد