وزیراعلیٰ مریم نواز نے ”گل داؤدی“ کی سالانہ نمائش اور کمرشل نرسری کا افتتاح کردیا ,عوام کوکھانے پینے کی اشیاء رعایتی نرخ پر مہیا کرنے کی ہدایت
لاہور ( ڈیلی پاکستان آن لائن )وزیراعلیٰ پنجاب مریم نواز نے جیلانی پارک میں ”گل داؤدی“ کی سالانہ نمائش اور پی ایچ اے کمرشل نرسری کا افتتاح کردیا ہے۔وزیر اعلیٰ مریم نواز نے کہا کہ پھول امن اور محبت کی علامت ہیں۔لاہور اور دیگر شہروں کے لوگ گل داؤدی کی نمائش دیکھنے ضرور آئیں۔ا نہوں نے گل داؤدی کی مختلف اقسام کا مشاہدہ کیا۔ وزیراعلیٰ نے گل داؤد ی کی رنگا رنگ اقسام میں دلچسپی کا اظہار کیا اور گل داؤدی سے بنے مختلف ماڈلز کا بھی معائنہ کیا۔
وزیر اعلیٰ مریم نواز نے گل داؤدی سے سجے اونٹ کے ماڈل اور پھولوں سے لدی بگھی کے سامنے تصویر بھی بنوائی۔ وزیر اعلیٰ نے خوبصورت آسٹریلین طوطے دیکھ کر مسرت کا اظہار کیا۔ آسٹریلین طوطے مہمانوں کودیکھ کرخوش آمدید کے انداز میں سرہلانے لگے۔ وزیر اعلیٰ نے جیلانی پارک کے اندر مختلف سٹال دیکھے۔ وزیر اعلیٰ نے عوام کوکھانے پینے کی اشیاء رعایتی نرخ پر مہیا کرنے کی ہدایت کی۔ وزیر اعلیٰ نے ایک سٹال سے کڑک چائے بنوائی۔ وزیر اعلیٰ مریم نواز نے پی ایچ اے کمرشل نرسری کا بھی معائنہ کیا اور تمام پودوں کا جائزہ لیا۔
وزیر اعلیٰ نے”پیس للی“ اور”ایئر پلانٹ“ کے پودوں میں دلچسپی کا اظہار کیا۔ وزیر اعلیٰ کو زیتون کے مقامی پودے بھی دکھائے گئے۔ وزیر اعلیٰ کو”انار، بون سائی“کے پودے کاتحفہ پیش کیا گیا۔ وزیر اعلیٰ اور دیگر مہمانوں نے الیکٹرک کارٹ میں سواری بھی کی۔
وزیر اعلیٰ کوڈی جی پی ایچ اے محمد طاہر وٹو نے گل داؤدی نمائش بارے میں بریفنگ د یتے ہوئے بتایا کہ نمائش جیلانی باغ میں 10 روز تک جاری رہے گی۔ نمائش میں200کے قریب نایاب اور منفرد اقسام کے گل داؤدی کے رنگ برنگے پھول رکھے گئے ہیں۔ ہرشام میں لائٹ شو بھی پیش کیا جائے گا۔
بریفنگ میں مزید بتایا کہ گل داؤدی کی نمائش کی تیاری کیلئے پی ایچ اے کی نرسریوں میں 1 سال تک نگہداشت کی جاتی ہے۔ گل داؤدی کی عمر 15 سے 20 دن ہوتی ہے جبکہ دسمبر کے پہلے ہفتے یہ نایاب پھول اپنے جوبن پر ہوتا ہے۔
