سپریم کورٹ نے 8 سالہ بچی سے زیادتی کے مجرم کی سزائے موت کے خلاف اپیل پر فیصلہ سنا دیا
اسلام آباد(ڈیلی پاکستان آن لائن ) سپریم کورٹ نے 8 سال کی بچی سے زیادتی کے مجرم کی سزائے موت کےخلاف اپیل کا فیصلہ جاری کردیا ہے ۔
تفصیلات کے مطابق سپریم کورٹ نے 8 سالہ بچی سے زیادتی کے مجرم وہاڑی کے رہائشی علی حیدر عرف پپو کی اپیل مسترد کردی اور اس کی سزائے موت کا فیصلہ برقرار رکھاہے۔سپریم کورٹ کے 9 صفحات پر مشتمل فیصلے کو جسٹس سید منصور علی شاہ نے تحریر کیا ہے جس میں ہدایت کی گئی ہے کہ کیمیکل معائنے سے متعلق حکومت فوجداری قانون کے سیکشن 510 میں ترمیم کرے اور قانون میں ترمیم کے لیے فیصلے کی کاپی قانون اورپارلیمانی امورکی وزارتوں کو دی جائیں۔عدالتی فیصلے میں کہا گیا ہے کہ حکومت ہر سرکاری فرانزک رپورٹ کو قبول کرنے کا عمل روک دے، زیادتی اورقتل میں صرف ڈی این اے رپورٹ کوبطورقابل قبول شہادت استعمال کیاجائے۔