معاشی معاملات میں مداخلت نہیں کریں گے ،معاشی معاملات میں ہماری مہارت نہیں ، چیف جسٹس پاکستان کے الیکٹرک نجکاری کیس میں ریمارکس

اسلام آباد(ڈیلی پاکستان آن لائن)الیکٹرک نجکاری کیس میں چیف جسٹس عمر عطا بندیال نے ریمارکس دیتے ہوئے کہاکہ معاشی معاملات میں مداخلت نہیں کریں گے ،معاشی معاملات میں ہماری مہارت نہیں ہے۔
نجی ٹی وی چینل دنیا نیوز کے مطابق الیکٹرک نجکاری کیس کی سپریم کورٹ میں سماعت ہوئی،چیف جسٹس پاکستان نے وکیل سے مکالمہ کرتے ہوئے کہاکہ آپ متعلقہ ہائیکورٹ سے رجوع کر سکتے ہیں،پارلیمنٹ نے آرٹیکل 184 کی شق3 سے متعلق 2 قوانین بنائے ہیں ۔
وکیل درخواست گزارنے کہاکہ کے ایس سی لیبر یونین کیخلاف درخواست بھی آئی ہے،جسٹس عائشہ ملک نے ریمارکس دیتے ہوئے کہاکہ وہ کیس اس وقت ہمارے سامنے نہیں ہے ۔
وکیل درخواست گزار نے کہاکہ کیس کی سماعت آئندہ ہفتے تک ملتوی کی جائے، چیف جسٹس نے کہاکہ آئندہ ہفتے چھٹیاں شروع ہو رہی ہیں، ججز دستیاب نہیں ہوں گے،آئندہ ہفتے ججز متعلقہ رجسٹریوں میں ہوں گے،آپ ہدایات لے لیں، کل کیس سنیں گے۔
عدالت نے ریمارکس دیئے کہ کے الیکٹرک کی نجکاری کو 18 سال ہو چکے ،عدالت نے کیس کی سماعت کل تک ملتوی کردی ۔