آئندہ مالی سال کا ترقیاتی بجٹ کتنا ہو گا ،  کس صوبے کے لیے کتنا تجویز کیا گیا ؟ اہم تفصیلات سامنے آگئیں

  اسلام آباد( ڈیلی پاکستان آن لائن )  آئندہ مالی سال کے بجٹ میں ترقیاتی بجٹ کتنا ہو گا ،  کس صوبے کے لیے کتنا تجویز کیا گیا ہے؟اس حوالے سے اہم تفصیلات سامنے آ ئی ہیں ۔

"جیو نیوز " کے مطابق آئندہ مالی سال کا ترقیاتی بجٹ  رواں سال کے بجٹ  کی نسبت 4 فیصد زیادہ ہے۔ذرائع کا کہنا ہے کہ  مجموعی ترقیاتی بجٹ میں وفاقی ترقیاتی بجٹ کاحجم 1100 ارب روپے تجویزکیاگیا ہے اور وفاقی ترقیاتی بجٹ کا حجم رواں سال کی نسبت 31 فیصد یا  223  ارب روپے زیادہ ہے جب کہ وفاقی ترقیاتی بجٹ میں 150 ارب روپےکا نجی ترقیاتی بجٹ بھی شامل ہے۔

ذرائع  کے مطابق  ترقیاتی بجٹ میں صوبائی ترقیاتی بجٹ کا حصہ 1560 ارب روپے ہے، سندھ کا ترقیاتی بجٹ 40 فیصد اضافے سے 617 ارب روپے تجویز کیا گیا ہے جب کہ رواں سال سندھ کا ترقیاتی بجٹ 442ارب روپے ہے۔خیبرپختونخوا کا عبوری بجٹ 4 مہینے کے لیے تجویز کیا جا رہا ہے اور خیبرپختونخوا کا عبوری ترقیاتی بجٹ 268 ارب روپے تجویز کیا جارہا ہے، اگلے مالی سال کے لیے بلوچستان کا ترقیاتی بجٹ 248 ارب روپے تجویز کیا گیا ہے،بلوچستان کا ترقیاتی بجٹ موجودہ سال کی نسبت 65 فیصد زیادہ ہے۔ذرائع کا کہنا ہےکہ پارلیمنٹیرینز کی تجویزکردہ سکیموں کے لیے 90 ارب روپے مختص کیے جارہے ہیں۔