قومی پرچم کسی سیاسی جماعت کیلئے استعمال نہیں ہو سکتا، وزارت داخلہ

اسلام آباد (خصوصی رپورٹ) وزارت داخلہ کا کہنا ہے کہ پاکستانی جھنڈا کسی سیاسی جماعت کیلئے استعمال نہیں ہو سکتا۔ذرائع وزارت داخلہ ذرائع کے مطابق 1957 اور 1964میں بنائے گئے قواعد میں قومی پرچم کے تقدس اور احترام کو قانونی حیثیت دی گئی۔ پاکستانی پرچم کو کسی ادارے کے ٹریڈ مارک یا ڈیزائن کے طور پر استعمال نہیں کیا جا سکتا۔ قومی پرچم کو 23مارچ، 14اگست اور 25دسمبر یا گزٹیڈ قومی دن پر ہی پرائیویٹ عمارتوں پر لہرایا جا سکتا ہے۔ صدر، وزیر اعظم، گورنرز، وزرا، چیئرمین سینیٹ، سپیکر اور چیف الیکشن کمشنر کی رہائش گاہوں اور گاڑیوں پر عام دنوں میں جھنڈا لہرایا جا سکتا ہے۔ قواعد کے تحت عام دنوں میں صرف پارلیمنٹ، صوبائی اسمبلیوں، عدالتوں سمیت سرکاری عمارتوں پر ہی پرچم لہرایا جا سکتا ہے۔