شاہین انگلینڈ کو شکست دینے کیلئے پر عزم : واحد ٹی ٹونٹی آج کھیلا جا ئیگا

شاہین انگلینڈ کو شکست دینے کیلئے پر عزم : واحد ٹی ٹونٹی آج کھیلا جا ئیگا

  

لاہور(سپورٹس ڈیسک)انگلینڈ کیخلاف واحد ٹی ٹوئنٹی کیلیے پاکستان نے تیاریاں مکمل کر لیں جبکہ بھرپور پریکٹس سے بھی لہو گرمایا گیا۔پاکستان اور انگلینڈ کے مابین واحد ٹی ٹوئنٹی آج اتوار کو کھیلا جائے گا، کارڈف میں موجود گرین شرٹس نے گذشتہ روز پہلا پریکٹس سیشن کیا جس میں بیٹسمینوں نے دل کھول کر سٹروکس کھیلے، بیشتر گیندیں نیٹ سے ٹکراکر نیچے آتی رہیں۔فخرزمان اور بابر اعظم بڑی اچھی فارم میں نظر آئے اور بولرز کی کمزور گیندوں پر شاٹس کھیلتے رہے،حارث سہیل اور آصف علی نے بھی جارحانہ انداز اپنائے رکھا، تمام بیٹسمینوں نے باری باری پیسرز اور سپنرز کا سامنا کیا۔ہیڈ کوچ مکی آرتھر اور بیٹنگ کوچ گرانٹ فلاور غلط سٹروکس کی نشاندہی کرتے نظر آئے، لیگ سپنر یاسر شاہ نے کلائی کا زیادہ استعمال کرنے کیلیے خصوصی مشقیں کرتے ہوئے معمول سے زیادہ رفتار کے ساتھ بولنگ کی۔پیسرز نے بھی کنڈیشنز کا فائدہ اٹھاتے ہوئے نہ صرف بھرپور سپیڈ سے گیندیں کرائیں بلکہ باﺅنس کے بہتر استعمال میں مہارت بہتر بنانے کیلیے بھی سرگرم رہے، اظہر محمود لائن اور لینتھ بہتر بنانے کیلیے مشورے دیتے رہے، فہیم اشرف اور حسن علی نے طویل سپیلز کیے۔قبل ازیں ہیڈ کوچ مکی آرتھر نے کھلاڑیوں کو لیکچر دیتے ہوئے حوصلہ بڑھایا، منفرد فیلڈنگ ڈرلز سے بھی لہو گرمایا گیا،مختصر دوڑ کے اختتام پر کوئی کوچ اچانک دائیں یا بائیں ہوکر راستہ روکنے کی کوشش کرتا، کھلاڑی کو فوری اپنا رخ تبدیل کرتے ہوئے منزل تک پہنچنا پڑتا، رکاوٹوں کے اوپر اور درمیان سے گزارنے کا سلسلہ بھی جاری رہا۔

مزید :

کھیل اور کھلاڑی -