لاہور میں مارکیٹیں رات 10، ریسٹورنٹ 11بجے بند کرنے کا حکم، اتوار کو کمرشل سرگرمیوں پر پابندی
لاہور(نامہ نگار خصوصی، نیوز ایجنسیاں) لاہور ہائیکورٹ کے جسٹس شاہد کریم نے سموگ کے پیش نظر اتوار کے روز کمرشل سرگرمیاں مکمل بند کرنے کی تجویز دیدی،عدالت نے مارکیٹیں رات دس بجے اور ریسٹورنٹس رات گیارہ بجے بند کرنے کے نوٹیفکیشن پر عملدرآمد کی ہدایت کردی، عدالت نے ریمارکس دیئے کہ ایک دو ماہ یا چار ہفتے ایسا کرنا پڑے گا شادی ہالز پر بھی نظر رکھیں پورے10بجے ہالز بند ہونے چاہیے، شادیوں پر ون ڈش کی خلاف ورزی بھی ہورہی ہے لیکن اسکا ماحولیات سے تعلق نہیں، 2023 کے نوٹیفکیشن کیمطابق مارکیٹیں دس بجے بند ہوں گی لیکن اس کی خلاف ورزیاں جاری ہیں، نوٹیفکیشن پر پر عملدرآمد کرائیں، عدالت نے ہدایت کہ شہر میں پانچ منٹ کے لیے بھی ٹریفک بند نہیں ہونی چاہیے،عدالت ڈی سی لاہور کو رپورٹ جمع کرانے کی ہدایت کردی، عدالت نے شہر میں واسا کے تعمیراتی پروجیکٹس پر تشویش کا اظہار کرتے ہوئے استفسار کیا کہ واسا کے پروجیکٹ کب ختم ہونگے؟ واسا کے پروجیکٹ شروع ہوتے ہیں ختم ہونے کا نام نہیں لیتے، پائپ لائن ڈالنے کا پروجیکٹ لمبا نہیں ہونا چاہیے،بڑے بڑے پائپ لا کر چھ ماہ پہلے سڑکوں پر رکھ دیئے اس وجہ سے حادثات ہورہے ہیں، یہ کیا طریقہ کار پورے لاہور میں اتنی مٹی کر دی گئی ہے جس کی کوئی حد نہیں،اتنی مٹی میں سموگ گن کیا کام کرے گی؟ عدالت نے ریمارکس دیئے کہ ہر بندہ اپنی ذمہ داری ادا کرے یہ میرا اکیلے کا کام تو نہیں، محکمہ ماحولیات واسا اور ایل ڈی اے کو جرمانے کیوں نہیں کرتے؟واسا اپنے سارے پروجیکٹس کی تمام تفصیلات عدالت میں پیش کرے، بتایا جائے کہ کنٹریکٹ کے مطابق یہ پروجیکٹ کب ختم ہونے ہیں؟ عدالت نے محکمہ ماحولیات کو واسا اور ایل ڈی اے کے پروجیکٹس میں خلاف ورزیوں پر جرمانے کرنے کی ہدایت کردی، خلاف ورزیاں کرنے والے محکموں کو بھاری جرمانے کریں، جمعے کو آپ نے بتانا ہے کہ آپ نے کن پروجیکٹس پر کس محکمے کو کتنا جرمانہ کیا؟ کیس کی مزید سماعت 7 نومبر کو ہوگی۔ دریں اثنا ضلعی انتظامیہ نے ہائی کورٹ کے حکم پر تمام مارکیٹوں کے اوقات کار تبدیل کرنے کا فیصلہ کرلیا۔ڈپٹی کمشنر سید موسیٰ رضا نے تمام اسسٹنٹ کمشنرز کو 2023 کے نوٹیفکیشن پر عملدرآمد کی ہدایات جاری کردی۔ضلعی انتظامیہ کے مطابق انسداد اسموگ اقدامات کے تحت پیر سے ہفتہ مارکیٹیں رات دس بجے جبکہ ریسٹورنٹ اور کیفے رات گیارہ بجے بند ہوں گے۔اتوارکو مارکیٹیں دوپہر دو بجے سے رات دس بجے تک کھل سکیں گی، ہوم ڈیلیوری کی رات 2 بجے تک اجازت ہوگی۔میڈیکل اسٹورز، بیکریز، تندور، دودھ کی دکانیں، اسپتال، لیبارٹریز، پٹرول پمپ اور پنکچر شاپس کو استثنیٰ ہوگا۔ڈپٹی کمشنر لاہور سید موسیٰ رضا کا کہنا ہے کہ نئے اوقات کار پر پابندی لازمی ہوگی، خلاف ورزی پردوکاندار ہوٹلز ریسٹوانٹس کو سیل کیا جائے اور بھاری جرمانے ہونگے۔
مارکیٹیں بند
