سکیورٹی فورسز کا قلات میں آپریشن، بھارتی حمایت یافتہ 4دہشتگردہلاک 

                                                                        راولپنڈی (مانیٹرنگ ڈیسک) سکیورٹی فورسز نے قلات میں آپریشن کر کے بھارتی حمایت یافتہ 4 دہشتگردوں کو جہنم واصل کر دیا۔پاک فوج کے شعبہ تعلقات عامہ کے مطابق بلوچستان کے ضلع قلات میں دہشتگردوں کی موجودگی کی اطلاع پر آپریشن کیا گیا، سکیورٹی فورسز نے دہشتگردوں کے ٹھکانے کو مؤثر انداز میں نشانہ بنایا۔آئی ایس پی آر کے مطابق فائرنگ کے تبادلے میں بھارتی پراکسی فتنہ الہندوستان سے تعلق رکھنے والے 4 دہشتگردوں کو ہلاک کر دیا گیا، ہلاک دہشتگردوں سے اسلحہ اور گولہ بارود برآمد ہوا، مارے گئے دہشتگرد متعدد دہشتگرد کارروائیوں میں ملوث رہے۔ علاقے میں مزید دہشتگردوں کی تلاش کیلئے کلیئرنس آپریشن جاری ہے، ”عزمِ استحکام“ ویژن کے تحت انسدادِ دہشتگردی مہم پوری رفتار سے جاری رہیگی۔صدرِ مملکت آصف علی زرداری نے بلوچستان کے ضلع قلات میں کامیاب انٹیلی جنس بیسڈ آپریشن پر سکیورٹی فورسز کو خراجِ تحسین پیش کیا آصف علی زرداری نے چار بھارتی حمایت یافتہ دہشتگردوں کے خاتمے کو قومی سلامتی کیلئے اہم کامیابی قرار دیا اور سکیورٹی فورسز اور قانون نافذ کرنے والے اداروں کے عزم و استقلال کو سراہا۔ صدر نے وطن دشمن عناصر کیخلاف آپریشن“عزمِ استحکام”کے تسلسل کو قومی سلامتی کیلئے ناگزیر قرار دیا۔وزیرِ اعظم محمد شہباز شریف نے بھارتی پشت پناہی میں سرکردہ 4 دہشتگردوں کو جہنم رسید کرنے پر سکیورٹی فورسز کے افسران و اہلکاروں کی پیشہ ورانہ صلاحیتوں کی تعریف کرتے ہوئے کہا کہ دہشتگردی کی عفریت کے ملک سے مکمل خاتمے تک اس کیخلاف جنگ جاری رکھیں گے۔ ارض وطن کی حفاظت کے غیر متزلزل عزم میں مجھ سمیت پوری قوم افواج پاکستان کے شانہ بشانہ کھڑی ہے۔ادھر وفاقی وزیر داخلہ محسن نقوی نے بھی قلات میں بھارتی حمایت یافتہ دہشتگردوں کے خلاف کامیاب انٹیلی جنس بیسڈ آپریشن پر سکیورٹی فورسز کو خراج تحسین کیا اور سکیورٹی فورسز کی پیشہ وارانہ صلاحیتوں کو سراہا۔ 

دہشتگرد ہلاک