ٹرمپ نے اپنی جماعت کے امیدوار کے زہران ممدانی سے ہارنے کی وجہ بتا دی

واشنگٹن(ڈیلی پاکستان آن لائن)نیویارک کے میئر کے تاریخی انتخابات میں ریپبلکن پارٹی کو بڑا دھچکا لگا ہے۔

امریکی صدر ڈونلڈ ٹرمپ کی بھرپور مہم اور حمایت کے باوجود ڈیموکریٹک پارٹی کے مسلم امیدوار زہران ممدانی نے فیصلہ کن کامیابی حاصل کرتے ہوئے نیویارک سٹی کے میئر کا عہدہ جیت لیا۔

ان کی کامیابی نے نہ صرف نیویارک بلکہ پورے امریکہ میں ایک نئے سیاسی دور کی شروعات کی ہے، جہاں عوامی فلاح، برابری اور انصاف کے نعروں نے روایتی سیاست کو پیچھے چھوڑ دیا ہے۔
الیکشن کے نتائج سامنے آنے کے بعد ٹرمپ نے اپنی سوشل میڈیا سائٹ “ٹروتھ سوشل” (Truth Social) پر ردِعمل دیتے ہوئے ریپبلکن امیدوار کی شکست کی دو وجوہات بیان کیں۔

 

انہوں نے لکھا کہ ریپبلکنز کی شکست کی دو بڑی وجوہات ہیں، پہلی یہ کہ میں بیلٹ پر موجود نہیں تھا، اور دوسری وجہ امریکہ میں جاری حکومتی شٹ ڈاؤن ہے، جس نے پارٹی کیلئے مشکلات پیدا کیں۔

ٹرمپ کے حمایت یافتہ آزاد امیدوار اینڈریو کومو نے بھی شکست تسلیم کرتے ہوئے زہران ممدانی کو مبارکباد دی۔
انہوں نے کہا کہ “عوام کا فیصلہ قابلِ احترام ہے، میں ممدانی کو ان کی کامیابی پر دلی مبارکباد پیش کرتا ہوں۔”
دوسری جانب، سابق امریکی صدر باراک اوباما نے بھی حالیہ امریکی انتخابات میں ڈیموکریٹس کی کامیابیوں کو سراہتے ہوئے تمام جیتنے والے امیدواروں کو مبارکباد دی، خصوصاً زہران ممدانی کو، جن کی فتح کو امریکی تاریخ میں “تنوع اور شمولیت کی جیت” قرار دیا جا رہا ہے۔