پنجاب، 20ہزار 863دینی مدارس کا ڈیٹا، 56ہزار مساجد کی جیوٹیکنگ، نمبر شماری مکمل 

                                                            لاہور (جنرل رپورٹر)پنجاب میں مقامی معززین پر مشتمل مزید موثر مسجد مینجمنٹ کمیٹیوں پر اتفاق کیا گیا ہے۔ وزیراعلیٰ مریم نواز شریف کی زیر صدارت اجلاس میں بتایا گیا کہ امن و امان کیلئے ریاست،علما اور معززین ایک صف میں ہیں۔ حکومت پنجاب نے مساجد کے نظام کو عوامی امانت بنا دیا ہے۔ اجلاس میں صوبے میں مقامی معززین پر مشتمل مزید موثر مسجد مینجمنٹ کمیٹیوں کے قیام پر اتفاق کیا گیا۔ آئمہ کرام کے وظائف کی فوری ادائیگی یقینی بنانے کے احکامات جاری کر دیئے گئے۔ اجلاس میں بتایا گیا کہ پنجاب میں مساجد کے آئمہ کرام کی رجسٹریشن کیلئے فارم کی تشکیل آخری مراحل میں داخل ہے۔ وزیراعلیٰ مریم نواز شریف کی ہدایت پر ہر تحصیل آفس میں خصوصی کاؤنٹر قائم کیے گئے ہیں۔ اسسٹنٹ کمشنر آفس میں قائم سپیشل کاؤنٹر پر آئمہ کرام فارم کا پراسیس کیا جائے گا۔ آئمہ کرام کو وظیفہ کیلئے فارم مینوئل اور ڈیجیٹل دونوں شکل جمع کرانے کی سہولت دی جارہی ہے۔ آئمہ کرام کو وظائف کی ادائیگی کا عمل چند ہفتوں میں شروع ہو جائے گا۔ اجلاس میں بتایا گیا کہ تاریخ میں پہلی بار پنجاب میں دینی اداروں کی مکمل ڈیجیٹل میپنگ اورمدارس و مساجد کا ریکارڈ شفاف ڈیٹا بیس میں محفوظ کر لیا گیا۔ پنجاب بھر کے 20 ہزار 863 دینی مدارس کا مکمل ڈیٹا تیار لیا گیا۔ صوبے کی 56 ہزار مساجد کی جیو ٹیکنگ اور نمبرشماری بھی مکمل کر لی گئی۔ لاہور میں محکمہ اوقاف کی زیر نگرانی مساجد میں یکجہتی،ہم آہنگی اور مذہبی بھائی چارے کا نیا دور شروع ہوا ہے۔ اجلاس کو بریفنگ میں بتایا گیا کہ صوبے بھر میں 284مساجد میں محکمہ اوقاف اور 47 مساجد میں دیگر آئمہ کرام امامت پر مامور ہیں۔ آئمہ کرام کی دینی اورملی خدمات کے پیش نظر وظائف میں اضافہ کا فیصلہ کیا جائے گا۔بریفنگ میں مزید بتایا گیا کہ پنجاب میں ریاست کی رٹ قائم کرنے کیلئے افغان شہریوں کو املاک کرایہ پر دینے والے 64 افرادکو گرفتار کرکے متعدد مقدمات درج کیے گئے۔ بریفنگ میں مزید بتایا گیا کہ غیر قانونی افغان باشندوں کے کاروباری تعلق ثابت ہونے پر تین فیکٹری مالکا ن کیخلاف مقدمات درج کر لیے گئے۔ ”جی آیاں نوں“وزیراعلیٰ پنجاب مریم نواز شریف نے بابا گورو نانک دیوجی کی جنم دن کی تقریبات میں شرکت کے لئے آنے والے سکھ یاتریوں کا خیر مقدم کیا اورسکھ یاتریوں کی پنجاب آمد پرخوش آمدید کہا ہے۔وزیراعلیٰ مریم نواز شریف نے سکھ مہما ن یاتریوں کیلئے بہترین انتظامات اور فول پروف سیکیورٹی یقینی بنانے کی ہدایت کی ہے۔وزیراعلیٰ مریم نوازشریف نے کہا کہ سکھ مہما ن یاتریوں کو پنجاب میں آمد پر خوش آمدید کہتے ہیں۔سکھ یاتری ہمارے مہمان ہیں اورپنجاب کی مہمان نواز ی کا دنیا بھر میں چرچا ہے۔سکھ مہمانوں کو عزت و احترام اور محبت کی یادیں دینا چاہتے ہیں۔پنجاب میں مذہبی ہم آہنگی اور رواداری کا ماحول بہتر سے بہترین ہے۔

مریم نواز