ایف بی آر کا مینول ٹیکس ریٹرن فائل کرنے والوں کے لئے خصوصی سہولیات کا اعلان

اسلام آباد (سٹاف رپورٹر) فیڈرل بورڈ آف ریونیو نے پاکستان بھر میں ٹیکس نظام کی مکمل ڈیجیٹلائزیشن کے جاری عمل کے تحت مینول انکم ٹیکس فائلرز کے لیے خصوصی اقدامات کا اعلان کیا ہے۔
آن لائن فائلنگ سسٹم میں آسانی سے منتقلی کو یقینی بنانے کے لئے  ایف بی آر نے ٹیکس سال 2024 سے مینول ریٹرن فائلنگ کو ختم کر دیا تھا۔ تاہم ایف بی آر نے مینول ریٹرن جمع کرانے والے ٹیکس فائلرز کو آن لائن نظام سے ہم آہنگ ہونے میں درپیش دشواری کو مد نظر رکھتے ہوئے انہیں خصوصی سہولیات فراہم کرنے کا فیصلہ کیا ۔اس مقصد کے فروغ کے لیے  تمام ٹیکس دفاتر میں خصوصی سیل مینول ریٹرن فائل کر نے والے  ٹیکس دہندگان کو تمام ضروری قانونی اور تکنیکی معاونت فراہم کرے گا ۔ مزید برآں انکم ٹیکس آرڈیننس 2001  کے  سیکشن 214A کے تحت ایف بی آر نے مینول ٹیکس فائلرز کے لیے ریٹرن فائلنگ کی آخری تاریخ میں 30 نومبر 2025 تک توسیع کر دی ہے۔مینول ٹیکس دہندگان اپنے متعلقہ ٹیکس دفاتر سے رجوع کریں جہاں انہیں رجسٹریشن اور آن لائن ریٹرن فائلنگ میں مکمل معاونت مفت فراہم کی جائے گی۔ اگر کسی ٹیکس دہندہ کو اس عمل کے دوران قانونی مدد کی ضرورت ہو تو  موجودہ ٹیکس سال  کے دوران  ایف بی آر کے فیلڈ دفاتر یہ سہولت بھی مفت فراہم کریں گے۔