معرکۂ حق کے بعد پاکستان اور پاکستانی افواج کا دنیا میں قد بڑھا ہے، ناصر جنجوعہ

لاہور( ڈیلی پاکستان آن لائن)سابق مشیر قومی سلامتی ناصرجنجوعہ نے کہا ہے کہ معرکۂ حق کے بعد پاکستان اور پاکستانی افواج کا دنیا میں قد بڑھا ہے۔ بھارت دنیا میں تنہا ہوگیا ہے۔ ان خیالات اظہار انہوں نےمقامی ہوٹل میں’’پاکستان کی حالیہ سفارتی کامیابیاں، مستقبل کی امیدیں اور آئندہ دفاعی حکمتِ عملی‘‘ کے موضوع پر منعقدہ سیمینار میں کیا ۔

انہوں نے کہا کہ امریکہ نے امت مسلمہ کی تمام لیڈر شپ کو مار ڈالا۔ عراق،  لیبیا ،مصر ، شام کو تباہ کیا،  ایران پر بمباری کی۔  پاکستان امت مسلمہ کی واحد اسلامی جوہری قوت ہے جو دشمن کو کھٹکتا ہے۔اس موقع پر ڈاکٹر نوید الہیٰ، سید محمد مہدی، وائس ائیرمارشل (ر) ساجد حبیب ' میجر (ر) نیر شہزاد ، معروف صحافی سلمان غنی نے بھی اظہار خیا ل کیا ۔

فورم سے خطاب کرتے ہوئے صفدر علی خاں چیف ایڈیٹر ’’سرزمین‘‘ نے کہا کہ گزشتہ برسوں میں ہمارے اس خطے کا جغرافیہ تیزی سے تبدیل ہوا ہے۔ خلیجی سیاست، بڑی عالمی طاقتوں کی حکمتِ عملیاں اور خطّے میں معاشی منصوبہ بندی نے نئے توازن پیدا کیے ہیں اور خوشی کی بات ہے کہ ایسے موقع پر پاکستان نے متحرک سفارتکاری اختیار کی ہے تاکہ اپنے قومی مفادات کو محفوظ رکھا جا سکے اور بیرونی شراکت داریوں کو ممکن بنایا جائے۔جیسا کہ  سعودی عرب کے ساتھ سٹریٹجک دفاعی معاہدہ جس نے ہمارے خطّے میں اثر و رسوخ کو واضح طور پر بڑھایا ہے اور دونوں ممالک کے دفاعی تعاون کو باقاعدہ شکل دی ہے چنانچہ یہ معاہدہ علاقائی سلامتی کے منظرنامے میں ایک اہم موڑ ثابت ہو گا۔اسی طرح پاکستان اور چین نے تعلقات کو’’مضبوط و دیرپا‘‘ قرار دیتے ہوئے سی پیک ٹو کے اگلے مرحلے کی سمت متعین کی ہے؛ اس سے یقیناً توانائی، انفراسٹرکچر اور تجارت میں نئی راہیں کھلنے کی امید کی جا سکتی ہے۔   

سید مہدی شاہ نے کہا کہ پاکستان کے چین اور امریکہ کے ساتھ متوازی تعلقات سفارتی کامیابی ہے تاہم اس ضمن مین بہت کچھ کرنا ابھی باقی ہے ۔ ڈاکٹر نوید الہٰی نے کہا کہ پاکستان کی آبادی کا 60 فی صد حصہ نوجوانوں پر مشتمل ہے۔ اگر پاکستانی بابر جارہے ہیں تو یہ پاکستان کیلیے خوش آئند ہے۔ پاکستان اس وقت ہر لحاظ سے اچھی پوزیشن پر ہے۔

سینئر صحافی سلمان غنی نے کہا کہ پاک فوج نے اپناکام کر دکھایا تاہم سیاسی و معاشی میدان میں   بہت سا کام کرنا ابھی باقی ہے ۔تقریب سے خطاب کرتے ہوئے ائیر مارشل ( ر) ساجد حبیب نے آپریشن بنیان مرصوص میں مسلح افواج کی شاندار کارکردگی روشنی ڈالی۔ انہوں نے حصوصی طور پر پاک فضائیہ کی مہارت اور پیشہ وارانہ سرگرمیوں کے بارے  میں شرکاء کو آگاہ کیا۔ میجر (ر) نیر شہزاد نے کہا کہ اللہ پاک نے پاکستان کو بھارت کے خلاف سرخرو کیا جسکی صدر ٹرمپ نے بیسیوں بار گواہی دی۔