معاشروں کی فکری بلندی اور قومی خودی استاد کی رہنمائی کی مرہونِ منت ہے: محسن نقوی
اسلام آباد ( ڈیلی پاکستان آن لائن )وفاقی وزیر داخلہ محسن نقوی نے ٹیچرز ڈے پر تمام اساتذہ کو انکی گراں قدر خدمات پر خراج تحسین پیش کیا ہے۔ وزیرداخلہ محسن نقوی نے کہا کہ آج کا دن ان مقدس ہستیوں کے نام جنہوں نے ہر حالت میں علم کے چراغ کو اپنی محنت سے جلائے رکھا۔ استاد کی عظمت، کردار اور رتبے کے اعتراف کرنے والی اقوام ہی ترقی کی منازل طے کرتی ہیں، یہ دن اُن خدمات اور قربانیوں کی یاد دلاتا ہے جو استاد اپنی ذات کی نفی کر کے نسلوں کو بامقصد بناتا ہے۔معاشروں کی فکری بلندی، تہذیبی شائستگی اور قومی خودی استاد کی رہنمائی کی مرہونِ منت ہے۔
وزیر داخلہ نے کہا کہ معلم وہ منصب ہے جو انبیائے کرام کی میراث قرار پایا ۔ اللہ تعالیٰ نے مجھے جو منصب عطا کیے اس میں میرے محترم اساتذہ کی تربیت، محنت اور لگن شامل ہے، میں اپنے اساتذہ کا احسان کسی طور بھی نہیں اتار سکتا۔
وفاقی وزیرداخلہ محسن نقوی نے کہا کہ استاد نسلوں کی سوچ کی جہت، کردار کی سمت اور معاشرتی شعور عطا کرتا ہے، تاریخ گواہ ہے کہ ہر عہد کی عظمت کسی عظیم استاد کی تربیت یافتہ نسل سے جنم لیتی ہے۔ آئیں آج ہم اجتماعی طور پر یہ عہد کریں کہ استاد کی توقیر کو ریاستی بیانیے کا مرکزی جزو بنائیں گے۔ سب کو اس عزم کا اعادہ کرنا ہے کہ استاد کا احترام نظریئے کے طور پر اپنائیں گے۔
