سمندری طوفان "شکتی" کراچی سے تقریباً 800 کلو میٹر دور

کراچی (ڈیلی پاکستان آن لائن) محکمہ موسمیات نے تصدیق کی ہے کہ سمندری طوفان "شکتی" اس وقت کراچی سے تقریباً 800 کلو میٹر جنوب مغرب میں موجود ہے۔

 محکمے کے مطابق یہ شدید طوفان بحیرۂ عرب میں شمال مغرب کی سمت میں آگے بڑھ رہا ہے۔ طوفان کے اثرات کے باعث سندھ اور بلوچستان کے ساحلی علاقوں میں ہلکی بارش کی توقع ہے، جبکہ سمندری ہوائیں 40 سے 55 کلومیٹر فی گھنٹہ کی رفتار سے چلنے کا امکان ہے۔

اعلامیے میں مزید کہا گیا ہے کہ طوفان اگلے 12 گھنٹوں میں مزید کمزور پڑ جائے گا، تاہم اس کے باعث سمندر میں طغیانی کا سلسلہ 7 اکتوبر (منگل) تک برقرار رہ سکتا ہے۔