عمران خان خیبر پختونخوا کے احتساب کمیشن کا تالاب کب کھولیں گے ؟ مریم اورنگیزیب

اسلام آباد (این این آئی)وزیر مملکت اطلاعات، نشریات و قومی ورثہ مریم اورنگزیب نے کہا ہے کہ عمران خان خیبر پختونخوا کے احتساب کمیشن کا تالا کب کھولیں گے، وہ خیبرپختونخوا میں ڈینگی اور سیلاب پر قابو نہیں پا سکے لیکن پچھلے چار سال جھوٹ بولنے اور یوٹرن لینے میں ریکارڈ قائم کئے ہیں۔ اپنے بیان میں انہوں نے کہا کہ وزیراعلیٰ پنجاب پر لگائے گئے الزامات بے بنیاد اور من گھڑت ہیں کیونکہ چینی سفارتخانے نے عمران خان کے جھوٹے الزامات کو مسترد کردیا ہے۔ انہوں نے کہا کہ ایک دفعہ پھر عمران خان کو شرمندگی کا سامنا کرنا پڑا ہے لیکن شرمندہ وہ شخص ہوتا ہے جس میں شرم ہوتی ہے۔ انہوں نے کہا کہ یہ پتہ لگانا لازم ہے کہ عمران خان کایابیتی کمپنی سے کیا تعلق ہے ؟۔ انہوں نے کہا کہ وزیراعلیٰ پنجاب شہباز شریف تین دفعہ پنجاب کے وزیراعلیٰ بنے۔ پنجاب کے لوگوں کیلئے اربوں اور کھربوں کے منصوبے بنائے اور لگائے لیکن کبھی بھی بدترین دشمن بھی کرپشن کا الزام ثابت نہیں کر سکے۔ انہوں نے کہا کہ عمران خان نے وزیراعلیٰ پنجاب پر الزام لگا کر پنجاب کے لوگوں بالخصوص ملتان کی عوام کی ترقی کے حق پر حملہ کیا ہے۔ وزیر مملکت نے کہا کہ عمران خان سے معافی کی امید تو نہیں لیکن اتنے جھوٹ پکڑے جانے کے بعد امید ہے شرمندگی تو ضرور محسوس کریں گے۔
مریم اور نگزیب