52واں یوم دفاع کل منایا جائے گا

اسلام آباد(آن لائن)ملک بھر میں52واں یوم دفاع 6ستمبر کو روایتی جوش و خروش ، قومی و ملی جذبہ کے ساتھ منایا جائیگا، ملک بھر میں مختلف تقریبات کا اہتمام کیا جائے گا پوری قوم اس دن کو اس عزم کی تجدید کے ساتھ مناتی ہے کہ وطن عزیز کی سلامتی اور خود مختاری کیلئے کسی بھی قربانی سے دریغ نہیں کیا جائے گا۔6ستمبر یوم دفاع کو صبح کا آغاز ملک بھر کی تمام چھوٹی بڑی مساجد پاک فوج کے یونٹس،بحریہ کی تنصیبات اور فضائیہ کے بیسز میں نماز فجر کے بعد شہداء کیلئے قرآن خوانی اور ملک و قوم کی سلامتی اور استحکام کیلئے خصوصی دعاؤں سے ہو گا جبکہ وطن کے دفاع کیلئے جانوں کا نذرانہ پیش کرنے والے شہداء کی یادگاروں پر پھول چڑھانے کی تقریبات ہوں گی، فاتحہ خوانی کی جائے گی، لاہور،سرگودھا اور سیالکوٹ میں ہلال استقلال لہرائے جائیں گے۔یوم دفاع کے حوالے سے اخبارات خصوصی سپلیمنٹ شائع کریں گے اور65ء کی جنگ کے شہداء کو خراج عقیدت پیش کیا جائے گاپی ٹی وی اور نجی ٹی وی چینلز سے یوم دفاع کے حوالے سے خصوصی پروگرام ٹیلی کاسٹ کیے جائیں گے۔6ستمبر 1965ء کوبھارت نے لاہور پر چند گھنٹوں میں قبضہ کرنے کا خواب دیکھا پاکستان کی بہادر فوج اور قوم نے بھارت کے ارادوں کو خاک میں ملا کر انہیں دھول چاٹنے پر مجبور کر دیا تھا۔
یوم دفاع