وزیراعظم عمران خان کی زیرصدارت کراچی کمیٹی کا اجلاس جاری 

وزیراعظم عمران خان کی زیرصدارت کراچی کمیٹی کا اجلاس جاری 
وزیراعظم عمران خان کی زیرصدارت کراچی کمیٹی کا اجلاس جاری 

  

کراچی (ڈیلی پاکستان آن لائن)وزیراعظم عمران خان کی زیرصدارت کراچی کمیٹی کا اجلاس جاری ہے،اجلاس میںگورنر سندھ عمران اسماعیل،وفاقی وزرااسد عمر،شبلی فراز،علی زیدی اورامین الحق شریک ہیں ، وزیراعلیٰ سندھ مرادعلی شاہ بھی اجلاس میں شریک ہیں ،وزیراعظم عمران خان کو مجوزہ پلان پر بریفنگ دی گئی ۔اجلاس سے قبل وزیراعظم سے گورنر اوروزیراعلیٰ سندھ کی علیحدہ علیحدہ ملاقات کی۔

میڈیا رپورٹس کے مطابق وزیراعظم کراچی کے مسائل کے حل کے لیے کراچی ٹرانسفارمیشن پلان کا اعلان کریں گے۔ پلان کے مطابق شہر قائد کے لیے 802 ارب روپے کے ترقیاتی منصوبوں کا اعلان کیا جائے گا۔ پلان کے تحت ماس ٹرانزٹ سسٹم کے 447 ارب 43 کروڑ روپے مالیت کے 6 منصوبوں کا اعلان کیا جائے گا۔

ماس ٹرانزٹ کا 300 ارب روپے مالیت کا کراچی سرکلر ریلوے پراجیکٹ ٹرانسفارمیشن پلان میں شامل ہے، کراچی سرکلر ریلوے کے لیے 250 ارب روپے چینی حکومت فراہم کرے گی جبکہ سندھ حکومت کراچی سرکلر ریلوے کے لیے 50 ارب روپے فراہم کرے گی۔

کراچی ٹرانسفارمیشن پلان کے مطابق کراچی میں سیوریج کے 8 منصوبوں کا تخمینہ 162 ارب 60 کروڑ روپے لگایا گیا ہے جبکہ سالڈ ویسٹ مینجمنٹ کے چار منصوبوں کی لاگت کا تخمینہ 14 ارب 86 کروڑ روپے لگایا گیا ہے۔ واٹر ڈرینز کے دو منصوبوں کی لاگت کا تخمینہ 4 ارب 70 کروڑ روپے لگایا گیا ہے، اس کے علاوہ کراچی کی مختلف سڑکوں کی تعمیر و مرمت کے منصوبوں کا تخمینہ 62 ارب 30 کروڑ روپے لگایا گیا ہے۔

وزیراعظم سے ارکان اسمبلی اتحادی رہنما اور این ڈی ایم حکام ملاقات کریں گے۔ وزیراعظم عمران خان کراچی سٹاک ایکسچینج کا بھی دورہ کریں گے جہاں وہ تاجروں اور صنعت کاروں سے ملاقات کریں گے۔

مزید :

قومی -علاقائی -سندھ -کراچی -