معروف عالمِ دین پیر محفوظ الحق شاہ سپردِ خاک، نماز جنازہ میں ہزاروں افراد کی شرکت
بورے والا (ڈیلی پاکستان آن لائن) معروف عالمِ دین پیر سید محفوظ الحق شاہ کو نماز جنازہ کی ادائیگی کے بعد آہوں اور سسکیوں کے ساتھ سپردِ خاک کردیا گیا ہے۔
پیر محفوظ الحق شاہ کی نماز جنازہ گورنمنٹ کالج کے باہر والے گراؤنڈ میں ادا کی گئی۔ ان کی نماز جنازہ سابق وفاقی وزیر مولانا حامد سعید کاظمی نے پڑھائی۔ نماز جنازہ میں اراکین اسمبلی چوہدری فقیر احمد آرائیں، سید ساجد مہدی سلیم شاہ، سردار خالد محمود ڈوگر، چوہدری محمد یوسف کسیلیہ سمیت سابق ارکان قومی و صوبائی اسمبلی چوہدری نذیر احمد جٹ، چوہدری نذیر احمد آرائیں، چوہدری قربان علی چوہان، چوہدری خالد محمود چوہان، ملک نوشیر خاں لنگڑیال، چیئرمین میونسپل کارپوریشن تحصیل بورے والا چوہدری محمد عاشق آرائیں، پاکستان علما کونسل کے تحصیل صدر مولانا زبیر آزاد، جنرل سیکرٹری مولانا احسان الحق، مولانا حمزہ غفار سمیت مذہبی سکالرز، علماء کرام، وکلاء،ڈاکٹرز، تاجر برادری اور ملک بھر سے آئے ہوئے ان کے عقیدت مندوں کے علاوہ ہزاروں افراد نے شرکت کی۔
پیر محفوظ الحق شاہ مرحوم کا قل خوانی کا ختم کل صبح سات بجے سے دن 12 بجے تک پڑھا جائے گا۔ ان کا انتقال گزشتہ روز مختصر علالت کے بعد ہوا تھا۔ پیرسید محمد محفوظ الحق شاہ کا اہلسنت والجماعت کےمعروف بزرگوں میں شمار ہوتا تھا ،انہوں نے تفسیر قرآن کے علاوہ کئی کتابیں تصنیف کیں۔
