دہشتگردی کیخلاف جنگ، علماء کی مشاورت سے قومی مہم شروع کر ینگے: وزیر داخلہ
اسلام آ باد (آئی این پی) وفاقی وزیر داخلہ محسن نقوی نے کہا ہے کہ دہشتگردوں کا کوئی دین و مذہب نہیں، علما کرام سے مشاورت کی قومی مہم کا جلد آغاز کیا جائے گا،، علما کرام نے ہمیشہ پاکستان کی تعمیر و ترقی میں اپنا بھرپور کردار ادا کیا ہے، دشمن بدامنی پھیلا کر انتشار پیدا کر کے قومی یکجہتی کو نقصان پہنچانا چاہتا ہے، ہم سب ملکر دشمن کے ناپاک ایجنڈے کو ناکام بنائیں گے۔دہشتگردی کے خلاف جنگ میں علما سے مشاورت کی قومی مہم چلانے کا فیصلہ کیا گیا ہے، وفاقی وزیر داخلہ محسن نقوی سے چیئرمین مرکزی رویت ہلال کمیٹی پاکستان مولانا سید محمد عبدالخبیر آزاد نے ملاقات کی اور قیام امن اور دہشت گردی وفرقہ واریت کے خاتمے کیلئے اقدامات پر تبادلہ خیال کیا گیا۔ دونوں رہنماوں کے درمیان مذہبی ہم آہنگی، رواداری اور بین المسالک اتحاد کو فروغ دینے پر بھی گفتگو ہوئی۔ اس موقع پر وفاقی وزیر داخلہ محسن نقوی نے کہا کہ دہشتگردی کے خلاف جنگ میں علما کرام نے پہلے بھی قوم کی رہنمائی کی اور اب بھی اس کی اشد ضرورت ہے تاکہ موثر بیانیہ بناکر تمام مسالک کے علما کرام سے مشاورت کی جائے۔ دہشتگردی کے خلاف جنگ پاکستان کی بقا کی جنگ ہے، اس ناسور کے خاتمے کیلئے علما کرام کو ایک بار پھراپنا عظیم کردار کرنا ہے۔۔ مولانا عبدا لخبیر آزاد نے کہا کہ پیغام پاکستان، وہ عظیم بیانیہ ہے جس نے دہشت گردی، انتہا پسندی اور فرقہ واریت کو حرام قرار دیا ہے، موجودہ حالات میں بین المسالک و بین المذاہب ہم آہنگی اور قومی یکجہتی کیلئے حکومت سمیت سب کو کردار ادا کرنا ہوگا۔ پاکستان میں قیام امن کیلئے وزیر داخلہ محسن نقوی کی کوششیں اور خدمات لائق تحسین ہیں، دہشت گردی کے خاتمے کیلئے پوری قوم اپنی بہادر مسلح افواج اور سکیورٹی اداروں کے ساتھ کھڑی ہے۔
وزیر داخلہ
