وزیراعلٰی کی صوابی میں بننے والے اتلہ ڈیم پر کام کی رفتار کو تیز کرنے کی ہدایت

  وزیراعلٰی کی صوابی میں بننے والے اتلہ ڈیم پر کام کی رفتار کو تیز کرنے کی ...

  

        پشاور (سٹاف رپورٹر)وزیراعلیٰ خیبرپختونخوا محمو د خان کی زیر صدارت گزشتہ روز ضلع صوابی خصوصا ًحلقہ این اے۔18  کے ترقیاتی منصوبوں اور عوامی مسائل سے متعلق ایک اجلاس منعقد ہوا جس میں اُتلہ ڈیم کی تعمیر، حالیہ سیلابوں سے متاثرہ انفراسٹرکچر کی بحالی سمیت دیگر ترقیاتی منصوبوں اور عوامی مسائل سے متعلق معاملات کا جائزہ لیا گیا۔سابق سپیکر قومی اسمبلی اسد قیصر، رکن صوبائی اسمبلی رنگیز احمد کے علاوہ وزیراعلیٰ کے پرنسپل سیکرٹری امجد علی خان،سینئر ممبر بورڈ آف ریونیو ذاکر حسین آفریدی متعلقہ محکموں کے انتظامی سیکرٹریز اور دیگر متعلقہ حکام نے اجلاس میں شرکت کی۔ اجلاس کو بتایا گیا کہ صوابی میں حالیہ بارشوں اور سیلابوں سے متاثرہونے والے انفراسٹرکچر کی بحالی کیلئے درکار فنڈز کا تخمینہ ایک ارب روپے لگایا گیا ہے اور اس سلسلے میں وزیراعلیٰ کی منظوری کیلئے سمری بھی تیار کی گئی ہے۔وزیراعلیٰ نے متعلقہ حکام کو ہدایت کی کہ مذکورہ سمری کو جلد سے جلد پراسس کیا جائے تاکہ سیلاب سے متاثرہ انفراسٹرکچر کی بحالی کے کاموں کیلئے بروقت فنڈز کا اجراء کیا جا سکے۔ گدون کو تحصیل کا درجہ دینے کے سلسلے میں وزیراعلیٰ نے ڈپٹی کمشنر صوابی کو اس سلسلے میں جلد کیس تیار کرکے مزید پراسس کیلئے بورڈ آف ریونیو کو ارسال کرنے کی ہدایت کی۔ اسی طرح وزیراعلیٰ نے متعلقہ حکام کو صوابی میں بننے والے اُتلہ ڈیم پر کام کی رفتار کو تیز کرنے کی ہدایت کرتے ہوئے کہاکہ یہ منصوبہ صوابی میں پینے کے پانی کے مسئلے کو حل کرنے کیلئے ایک اہم منصوبہ ہے جس کی تکمیل میں غیر ضروری تاخیر کسی صورت برداشت نہیں کی جائے گی۔اُنہوں نے محکمہ خزانہ کے حکام کو اس منصوبے کیلئے رواں مالی سال کے دوران درکار فنڈز ترجیحی بنیادوں پر فراہم کرنے کی بھی ہدایت کی۔ اجلاس کو بتایا گیا کہ اُتلہ ڈیم کی تعمیر سے صوابی کے 13 دیہاتوں کی 40 ہزار سے زائد آبادی کو پینے کے پانی کی فراہمی ممکن ہو سکے گی۔ اس موقع پر وزیراعلیٰ نے متعلقہ محکموں کے حکام کو بام خیل سپورٹس کمپلیکس کو کیٹگری اے سپورٹس کمپلیکس بنانے کیلئے درکار اضافی اراضی فراہم کرنے کیلئے بھی ضروری اقدامات کی ہدایت کی۔ وزیراعلیٰ نے انتظامی سیکرٹریز کو یہ بھی ہدایت کی کہ وہ اپنے متعلقہ محکمے کے تحت ضلع صوابی میں جاری ترقیاتی منصوبوں کو مقررہ مدت کے اندر تکمیل کو یقینی بنانے کیلئے ٹھو س اقدامات اُٹھائیں تاکہ لوگ بلا تاخیر ان منصوبوں سے مستفید ہو سکیں۔ 

مزید :

صفحہ اول -