لاہور ( ڈیلی پاکستان آن لائن )وزیر اعلیٰ پنجاب کی ہدایات کے پیشِ نظر پی ڈی ایم اے پنجاب نے مون سون فلڈ کی صورتحال کےبارے میں فیکٹ شیٹ جاری کر دی۔
تفصیلات کے مطابق گزشتہ 24 گھنٹوں میں گجرات 86، نارووال 37، ملتان 28، ڈی جی خان 27 اور جہلم میں 22 ملی میٹر تک بارشیں ریکارڈ کی گئیں۔ سیالکوٹ، اٹک، منگلا، مری، راولپنڈی، لیہ، میانوالی اور کوٹ ادو میں بھی بارش ریکارڈ کی گئی۔ آئندہ 24 گھنٹوں میں پنجاب کے بیشتر اضلاع میں بارشیں متوقع ہیں۔ مون سون بارشوں کا چھٹا سپیل 7 اگست تک جاری رہنے کی پیشگوئی ہے۔
ڈائریکٹر جنرل پی ڈی ایم اے عرفان علی کاٹھیا نے انتظامیہ کو الرٹ رہنے کی ہدایات جاری کیں۔ ڈی جی پی ڈی ایم اے کا کہنا تھا کہ دریائے سندھ میں تربیلا مقام پر نچلے درجے کا سیلاب ہے۔ کالاباغ، چشمہ اور تونسہ کے مقام پر پانی کا بہاؤ نارمل سطح پر ہے۔ دریائے چناب، جہلم، راوی اور ستلج میں پانی کا بہاؤ نارمل سطح پر ہے۔ رودکوہیوں اور بڑے دریاؤں سے ملحقہ ندی نالوں میں بھی پانی کا بہاؤ نارمل سطح پر ہے۔ تربیلا ڈیم 95 فیصد جبکہ منگلا ڈیم 62 فیصد تک بھر چکاہے۔ بھارتی ڈیمز میں پانی کی سطح 56 فیصد تک ہے۔ شہریوں سے گزارش ہے کہ موسم برسات میں احتیاطی تدابیر اختیار کریں۔ بچوں کا خیال رکھیں انہیں برساتی نالوں نشیبی علاقوں دریاؤں اور نہروں میں ہرگز مت نہانے دیں۔
رواں سال موسم مون سون بارشوں کے باعث مختلف حادثات میں 164 شہری جاں بحق ہوئے۔ گزشتہ 24 گھنٹوں میں مختلف مون سون بارشوں میں حادثات کے باعث 3 شہری زخمی ہوئے۔ وزیر اعلیٰ پنجاب کی ہدایات کے پیشِ نظر متاثرہ فیملیز کو مالی معاونت فراہم کی جا رہی ہے۔ 582 شہری زخمی 216 گھر متاثر اور 121 مویشی ہلاک ہوئے۔