میکسیکو‘چوری شدہ تابکار مادہ برآمد، چوروں کو خطرہ لاحق
میکسیکو سٹی (آن لائن)میکسیکو میں چوری ہونے والا وہ ٹرک تلاش کر لیا ہے جس پر خطرناک تابکار طبی مادہ لدا ہوا تھا۔مقامی حکام نے بتایا ہے کہ انھوں نے تابکار مادہ کوبالٹ 60 اپنے حفاظتی خول سے نکال کر یوں ہی چھوڑ دیا گیا تھا اور اس کی قربت میں رہنے کی وجہ سے اسے چرانے والے افراد کی جان کو خطرات لاحق ہو سکتے ہیں۔حکام کا کہنا ہے کہ چور اس مادے سے خارج ہونے والی تابکاری کی زد میں آئے ہوں گے لیکن مقامی رہائشیوں کی صحت کو اس سے کوئی خطرہ لاحق نہیں۔وہ تابکار مادہ اور ٹرک دارالحکومت میکسیکو سٹی کے نواح سے برآمد ہوا۔میکسیکو کی نیشنل جوہری سکیورٹی کمیشن (این این ایس سی) کے حکام نے بتایا کہ یہ تابکار مادہ ہوئپوکسلا شہر کے پاس ملا اور یہ اس جگہ سے بمشکل دو کلو میٹر کے فاصلے پر تھا جہاں سے ٹرک چوری ہوا تھا۔این این ایس سی کے اہلکار مارڈونیو جیمینیز نے کہا: ’تابکار مادہ اپنے کنٹینر سے باہر 500 سے 700 میٹر کی دوری پر پڑا ہوا تھا۔‘ اس کے ساتھ ہی انھوں نے آگاہ کیا کہ اسے جس کسی نے کھولا تھا اس کی موت واقع ہو سکتی ہے کیونکہ اس مادے کی شدت بہت زیادہ تھی۔مسٹر جیمینیز نے کہا: ’انھیں بالآخر کسی نہ کسی ہسپتال میں جانا پڑے گا اور ہم ان کا انتظار کر رہے ہیں۔بین الاقوامی جوہری توانائی کے ادارے آئی اے ای اے نے اس مادے کو ’انتہائی خطرناک‘ قرار دیتے ہوئے خدشہ ظاہر کیا تھا کہ اس کا استعمال کسی قسم کے ’ڈرٹی بم‘ کی تیاری کے لیے کیا جا سکتا ہے۔
بہرحال حکام کا کہنا ہے کہ یہ چوری بظاہر موقع کا فائدہ اٹھانے کا معاملہ دکھائی دیتا ہے جو الٹا چوروں کے گلے پڑ گیا۔واضح رہے کہ کوبالٹ 60 کا استعمال کینسر کے علاج میں ہوتا ہے اور اسے میکسیکو کے شمالی شہر ٹیجونا کے ہسپتال سے دارالحکومت کے قریب ایک ڈسپوزل مرکز لایا جا رہا تھا۔
