عمران فاروق قتل کیس کےملزمان ایک روزہ ریمانڈ پر پولیس کے حوالے
اسلام آباد(مانیٹرنگ ڈیسک) ڈاکٹر عمران فاروق قتل کیس کے تین ملزمان کورینجرز کی سخت سیکیورٹی میں عدالت میں پیش کردیا گیا جہاں عدالت نے ملزمان کو ایک روزہ راہداری ریمانڈ پر پولیس کے حوالے کردیا۔
تینوں ملزمان کو ڈیوٹی جج حیدر علی شاہ کی عدالت میںپیش کرنے سے قبل مقدمے کے تفتیشی افسر نے عدالت سے ملزمان کے سیکیورٹی انتظامات کی اجازت طلب کی ۔ عدالت سے اجازت ملنے کے بعد تینوں ملزمان ملزم معظم علی، خالد شمیم، سید محسن علی کو رینجرز کی کڑی نگرانی میں عدالت میں پیش کیا گیا۔پولیس نے عدالت سے تینوں ملزمان کاایک روزہ جسمانی ریمانڈ دینے کی استدعا کی اور کہا کہ ایک روزہ ریمانڈ کے بعد کل ملزمان کو انسداد دہشتگردی کی عدالت میں پیش کرکے مزید ریمانڈ حاصل کیا جائے گا۔
عدالت کے روبرو قتل کی ایف آئی آر پیش کی گئی جس کے پڑھنے کے بعد عدالت نے ملزمان کو ایک روزہ راہداری ریمانڈ پر پولیس کے حوالے کردیا۔
واضح رہے کہ ڈیوٹی جج کی عدالت میں پیش کیے جانے کی وجہ سے عدالت ملزمان کا جسمانی ریمانڈ نہیں دے سکتی اس لیے عدالت نے ملزمان کو ایک روزہ راہداری ریمانڈپر پولیس کے حوالے کردیا ہے۔
