ملک میں برفباری اور دھند کی وجہ سے سردی کی شدت میں مزید اضافہ ہو گیا
اسلام آباد /گلگت /فیصل آباد /لیہ (آئی این پی)ملک کے بالائی علاقوں میں برفباری اور میدانی علاقوں میں دھند کی وجہ سے سردی کی شدت میں مزید اضافہ ہو گیا، حد نگاہ صفر ہونے پر موٹر وے کو ٹریفک کے لیے بند کرکے ٹریفک کا رخ جی ٹی روڈ کی جانب منتقل کر دیا گیا،ڈرائیورز حضرات کو گاڑی کی رفتار آہستہ رکھنے اور فوگ لائٹس کے استعمال کی ہدایات کی گئی،محکمہ موسمیات نے آئندہ دو روز کے دوران ملک کے بیشتر علاقوں میں موسم خشک رہے کی پیشگوئی کی۔ گلگت بلتستان کے بالائی علاقوں میں برفباری سے سردی کی شدت مزید بڑھ گئی۔ دیامر کے پہاڑوں بابو سر، نگا پربت، نیاٹ ویلی میں برفباری کا سلسلہ وقفے وقفے سے برفباری کا سلسلہ جاری ہے جسکی وجہ سردی بڑھتی جارہی ہے اور چلاس شہر میں گہرے بادل چھائے ہوئے ہیں۔ادھر کشمیر اور ملکہ کوہسار مری میں بھی ٹھنڈی ہواوں کی وجہ سے سردی اپنے زوروں پر ہے۔بلوچستان کے شہروں میں خشک سردی اور سندھ کے شہروں میں ہلکی سردی کا راج ہے۔ پنجاب کے اکثر جبکہ خیبر پختونخوا کے بعض علاقے دھند کی لپیٹ میں ہیں۔ شدید دھند کے باعث لاہور سے کالا شاہ کاکو تک موٹروے کو ٹریفک کے لیے بند کر دیا گیا۔ موٹروے ذرائع کے مطابق حد نگاہ صفر ہونے پر موٹر وے کو ٹریفک کے لیے بند کیا گیا ہے اور ٹریفک کا رخ جی ٹی روڈ کی جانب منتقل کر دیا گیا ہے۔ڈرائیورز حضرات کو گاڑی کی رفتار آہستہ رکھنے اور فوگ لائٹس کے استعمال کی ہدایات دی گئی ہیں۔
