پاکستان کا کورونا ویکسین کی فنڈنگ کیلئے ورلڈ بینک سے رجوع کرنے کا فیصلہ

  اسلام آباد(آئی این پی) حکومت نے کورونا ویکسین کی فنڈنگ کیلئے ورلڈ بینک سے رجوع کرنے کا فیصلہ کر لیا، پاکستان ورلڈ بینک سے ویکسین بکنگ کیلئے15کروڑ 30لاکھ ڈالر امداد فراہمی کی درخواست کی جائے گی۔ورلڈ بینک سے امداد کیلئے باضابطہ درخواست اقتصادی رابطہ ڈویژن کرے گی۔ وزارت قومی صحت نے اقتصادی رابطہ ڈویژن کے نام مراسلہ میں کہا ہے کہ اقتصادی رابطہ ڈویژن امداد کیلئے ورلڈ بینک سے باضابطہ درخواست کرے اور ورلڈ بینک سے فنڈنگ کریڈٹ 6590معاہدے کے تحت امداد مانگی جائے۔ ورلڈ بینک سے امداد کی منظوری پر ویکسین کی بکنگ کرائی جائے گی۔ فنڈنگ کیلئے ورلڈ بینک سے بذریعہ ویڈیو لنک ابتدائی بات چیت بھی ہو چکی ہے۔ کرونا ویکسین کی ایڈوانس بکنگ کے لیے عالمی سطح پر رابطے جاری ہیں۔مراسلے میں کہا گیا ہے کہ پاکستان کرونا ویکسین ساز اداروں سے براہ راست رابطے کر رہا ہے۔ یہ رابطے گاوی کے ذریعے ہو رہے ہیں، ای سی سی ویکسین کے لیے 15کروڑ ڈالر کی ضمنی گرانٹ کی منظوری دے چکی ہے۔
ورلڈ بنک امداد