بلین ٹری حکومت کا فلیگ شپ منصوبہ،تفصیلات سپریم کورٹ میں پیش کرینگے:ملک امین اسلم

 اسلام آباد(مانیٹرنگ ڈیسک،نیوزایجنسیاں)  وزیراعظم نے بلین ٹری منصوبے کی مکمل تفصیلات عدالت کو دینے کی ہدایت کرد یں۔تفصیلات کے مطابق وزیراعظم عمران خان اور معاون خصوصی موسمیاتی تبدیلی ملک امین اسلم کے درمیان مشاورت کی گئی جس کے بعد وزیراعظم نے منصوبے کی تمام تفصیلات عدالت کو دینے کی ہدایت کی۔وزیراعظم اور معاون خصوصی کی ملاقات میں بلین ٹری منصوبے کی ڈرون ویڈیوز اور مستند تصاویر کا ریکارڈ حاصل کرنے کا فیصلہ کیا گیا۔وفاقی حکومت نے عدالتی احکامات پر تمام صوبوں سے ڈیٹا طلب کرلیا اور سیٹلائٹ تصاویر کیلئے سپارکو سے بھی رابطہ کیا ہے۔حکومت نے سپارکو سے بلین ٹری منصوبے کی سیٹلائیٹ امیجز فراہم کرنیکی درخواست کردی ہے۔ دوسری جانب وزارت موسمیاتی تبدیلی نے صوبوں سے درختوں سے متعلق رپورٹ طلب کرلی ہے اور اس سلسلے میں صوبائی سیکرٹریز محکمہ جنگلات و چیف سیکریٹریزکو بھی خطوط لکھ دیئے گئے ہیں جس میں محکمہ جنگلات سے 2019 تاجون 2020 درختوں کا ڈیٹا مانگا گیا ہے جب کہ تمام صوبوں سے درختوں کی تصاویر بھی مانگی گئی ہیں۔ذرائع کے مطابق 10 بلین ٹری سونامی پراجیکٹ ڈائریکٹر محمد سلیمان خان کمیٹی کے چیئرمین مقررکیے گئے ہیں، وزارت کی 10 رکنی کمیٹی سپریم کورٹ کو جواب جمع کرائے گی۔ذرائع کا کہنا ہے کہ وزیراعظم نے وزارت موسمیاتی تبدیلی کو سپریم کورٹ کے نوٹس کو سنجیدگی سے لینے کی ہدایت کی ہے۔دوسری طرف  ملک امین اسلم نے کہا کہ بلین ٹری وفاقی حکومت کا فلیگ شپ منصوبہ ہے، منصوبے میں مکمل شفافیت کے پہلو کو روز اول سے مقدم رکھا گیا۔انھوں نے کہا یہ منصوبہ وزیر اعظم کے میرٹ اور شفافیت کے وژن کے مطابق جاری ہے، عالمی ماحولیاتی اداروں نے بھی منصوبے سے متعلق شفافیت کا اعتراف کیا، اس منصوبے کی تفصیلات فراہم کرنے کے لیے عدالت سے بھرپور تعاون کریں گے۔
ملک امین اسلم