سندھ پیار محبت کرنے والوں کی دھرتی ہے:آصف علی زرداری
کراچی(ڈیلی پاکستان آن لائن) سابق صدر آصف علی زرداری نے کہا ہے کہ سندھ پیار محبت والوں کی دھرتی ہے اور حملہ آوروں کی مزاحمت کی تاریخ کی وارث ہے۔
سابق صدر آصف علی زرداری نے سندھ کے یوم ثقافت کے موقع پر تمام سندھیوں کو مبارکباد دیتے ہوئے کہا کہ پاکستان تمام شھریوں کی مادری زبان اور ثقافتوں کا گلدستہ ہے۔سابق صدر نے کہا کہ شہید قائد عوام ذوالفقار علی بھٹو نے لوک ورثہ بنایا کہ ہماری ثقافت زندہ رہے جبکہ اکیڈمی ادبیات کی بنیاد بھی شھید بھٹو کا کارنامہ ہے۔
آصف علی زرداری نے یہ بھی کہا کہ اپنی ثقافت کی بقا کے لیے ضروری ہے شدت پسندی کی مزاحمت کی جائے۔
سابق صدر آصف علی زرداری نے مزید کہا کہ سندھ پیار محبت والوں کی دھرتی ہے اور حملہ آوروں کی مزاحمت کی تاریخ کی وارث ہے اور اپنی تاریخ، زبان اور ثقافت کی حفاظت کرنے والی قومیں ہمیشہ زندہ رہتی ہیں۔
یاد رہے کہ دسمبر کے پہلے اتوار کو منایا جانے والا سندھ یوم ثقافت کو سندھ کے باسی عید کے تہوار کی طرح مناتے ہیں، ہر سال کی طرح اس سال بھی آج کا دن سندھ کلچرل ڈے کے طور پر منایا گیا۔
