مریم نواز نے دوسرے صوبوں کے طلباء کیلئے بھی ہونہار سکالر شپ کی منظوری دیدی
لاہور(ڈیلی پاکستان آن لائن )وزیراعلیٰ پنجاب مریم نواز نے دیگر صوبوں کے طلباء کے لیے ہونہار سکالر شپ سکیم کی منظوری دے دی ہے۔ دیگر صوبوں کے طلباء کے لیے بھی پنجاب کی طرح اہلیت کا یکساں معیار مقررکیا گیا ہے۔
تفصیلات کے مطابق وزیراعلیٰ مریم نواز کی زیر صدارت ہائر ایجوکیشن سے متعلق خصوصی اجلاس ہوا جس میں اہم فیصلے کیے گئے۔ وزیراعلیٰ نے پنجاب میں طلباء کے لیے لیپ ٹاپ کی تعداد بڑھا کر 1 لاکھ 10ہزارکر دی ۔ وزیراعلیٰ نے پنجاب میں سیکنڈ، تھرڈ اور فور تھ سمسٹرکے لیے ہونہار سکالرشپ کی باضابطہ منظوری دے دی ہے۔ وزیراعلیٰ مریم نواز نے ہونہار سکالرشپ اور لیپ ٹاپ سکیم کے طلباء کے لیے خصوصی ہیلپ لائن قائم کرنے کی ہدایت کی۔ اجلاس میں پنجاب میں لیپ ٹاپ حاصل کرنے کے لیے کم از کم65فیصداہلیت مقررکرنے کا فیصلہ کیا گیا۔
وزیراعلیٰ مریم نواز نے اجلاس میں گفتگو کرتے ہوئے کہا کہ ہونہار سکالرشپ اور لیپ ٹاپ ہر بچے کا حق اور حکومت کی ذمہ داری ہے۔ تعلیم اور یوتھ قوم کی حقیقی انویسٹمنٹ ہے۔ دل چاہتا ہے ہر بچے کو لیپ ٹاپ ملے۔ لیپ ٹاپ اور ہونہار سکالرشپ دیگر صوبوں کے طلبہ کا بھی حق ہے۔ آزاد کشمیر، گلگت بلتستان، بلوچستان اور خیبرپختونخوا سمیت دیگر صوبوں کے طلباء بھی ہمارے بچے ہیں۔میرٹ پر آنے والا ہر بچہ اچھے کالج میں اپلائی کرے فیس ہم دیں گے۔ماں کی طرح سوچتی ہوں، ہربچے کی قسمت بدلنا چاہتے ہیں۔
وزیراعلیٰ مریم نواز نے کہا کہ ہونہار سکالر شپ کے لیے جو پنجاب کا معیار ہے وہی دیگر صوبوں کے طلباء کے لیے مقرر کیا جائے گا۔ طلباء کے لیے کسی بھی سکیم میں فنڈز کی فراہمی رکاوٹ بننے نہیں دی جائے گی۔
اجلاس میں پنجاب میں ایک روزہ وی سی کانفرنس،ٹیک ایکسپوکی منظوری بھی دے دی گئی۔
