وفاقی حکومت کو اعتماد میں لیکر جلد وفد افغانستان بھیجیں گے: وزیراعلیٰ پختونخوا

پشاور(ڈیلی پاکستان آن لائن )وزیراعلیٰ خیبر پختونخوا علی امین گنڈاپور کا کہنا ہے کہ وفاقی حکومت کو اعتماد میں لے کر جلد ایک وفد افغانستان بھیجیں گے۔ 
نجی ٹی وی جیونیوز نے ذرائع کے حوالے سے بتایا کہ پاکستان اور افغانستان میں قیام امن کے لئے افغانستان جرگہ بھیجنے کے معاملے پر خیبرپختونخوا حکومت نے افغان حکومت سے رابطہ کیا تاہم امارات اسلامی افغانستان کے 2 اہم حکومتی عہدیداروں کے سعودی عرب کے دورے پر ہونے کے باعث ملاقات میں تاخیر ہو رہی ہے۔ 
ذرائع کا بتانا ہے کہ ابتدائی بات چیت کے لئے پہلے مشیر اطلاعات کے پی بیرسٹر محمد علی سیف اور قبائلی عمائدین پر مشمل چھوٹا وفد افغانستان جائے گا، مذاکرات میں پاک افغان سرحد کے اطراف قیام امن اور تجارتی تعلقات کے فروغ سمیت دیگر امور پرغور ہوگا۔
ذرائع کے مطابق ابتدائی بات چیت کے بعد دونوں ممالک کے درمیان گرینڈ جرگہ ہوگا جس میں دونوں ممالک کے قبائلی عمائدین اور عہدیدار شریک ہوں گے۔ 
اس حوالے سے نجی ٹی وی جیو نیوز سے گفتگو کرتے ہوئے وزیراعلیٰ کے پی علی امین گنڈاپور نے کہا کہ افغانستان کی وجہ سے خیبر پختونخوا متاثر ہو رہا ہے۔ 
انہوں نے کہا کہ ٹی او آرز بنا کر اور وفاقی حکومت کو اعتماد میں لے کر جلد وفد افغانستان بھیجیں گے، بات چیت کے لئے جرگہ بنائیں گے جس میں مختلف اقوام کے نمائندے شامل ہوں گے۔