اسلام آباد میں خودکش حملہ کرنیوالا پاکستانی شہری تھا،رشتے داروں تک پہنچ گئے ہیں: خواجہ آصف

اسلام آباد ( ڈیلی پاکستان آن لائن ) وزیر دفاع خواجہ محمد آصف نے کہا ہے کہ اسلام آباد میں خودکش حملہ کرنے والا پاکستانی شہری تھا۔ جو کچھ عرصہ قبل افغانستان چلا گیا تھا۔خودکش حملہ آور گزشتہ روز یا آج نوشہرہ سے اسلام آباد آیا، ہم خودکش حملہ آور کے رشتے داروں تک پہنچ گئے ہیں۔

’’جیو نیوز‘‘ کے پروگرام’’ آج شاہزیب خانزادہ کے ساتھ ‘‘گفتگو میں خواجہ آصف نے کہا کہ بھارت پراکسیز کے ذریعے پاکستان کا امن تباہ کرنا چاہتا ہے۔

وزیر دفاع نے مزید کہا کہ  حملے کے ذریعے پاکستان کی ترقی کی راہ میں رکاوٹ ڈالنے کی کوشش کی گئی ہے، افغانستان کے ساتھ بات چیت کا کوئی خاص فائدہ نہیں ہوا۔ دہشت گردی کے لیے ایسا موقع چنا گیا جب 2 ممالک کے ساتھ ہم نے معاہدے کیے، بھارت اب افغانستان کے ذریعے پاکستان میں دہشت گردی کی کوشش کر رہا ہے۔ خودکش حملے میں 31 افراد شہید اور تقریباً 150 زخمی ہوئے ہیں، پہلے بھارت کو شکست دی اب اس کی پراکسیز کو بھی شکست دیں گے۔

خواجہ آصف نے یہ بھی کہا کہ دہشت گردی کے حوالے سے وفاق اور خیبر پختونخوا حکومت کا رابطہ ہے، بظاہراب خیبر پختونخوا حکومت دہشت گردی کے خلاف جنگ کی اونرشپ لے رہی ہے۔