پنجاب بورڈ برائے سرمایہ کاری و تجارت اور سپینش کمپنی کے درمیان مفاہمت
لاہور(کامرس رپورٹر) پنجاب بورڈ برائے سرمایہ کاری و تجارت اور سپین کی کمپنی نیٹ ڈی گیررز نے باہمی تعاون اور سرمایہ کاری کے فروغ کیلئے مفاہمت کی ایک یادداشت پر دستخط کئے ہیں۔ مفاہمت کی یادداشت پر پنجاب بورڈ برائے سرمایہ کاری و تجارت کے چیف ایگزیکٹو آفیسر جہانزیب برانہ اور نیٹ ڈی گیررز کے ایڈورڈ نوارو نے دستخط کئے جبکہ اس موقع پر دیگر حکام بھی موجود تھے۔ مفاہمت کی یادداشت کے مطابق پی بی آئی ٹی اور سپینش کمپنی باہمی معاشی ترقی کیلئے مشترکہ دلچسپی کے امور پر ایک دوسرے کے ساتھ تعاون کریں گے جبکہ پنجاب میں سرمایہ کاری کے فروغ اور سرمایہ کاروں کے تحفظ کیلئے سپینش کمپنی اپنی خدمات مہیا کرے گی۔ اس کے علاوہ سپین کی کمپنی کی مدد سے پنجاب میں رئیل اسٹیٹ ، سیر و سیاحت، ٹیکسٹائل اور ٹرانسپورٹ سیکٹر کی بہتری کی راہ میں حائل رکاوٹیں دور کرنے کے ساتھ ساتھ سپین کے ساتھ باہمی معاشی تعاون کو بڑھا یا جائے گا۔ سپین کی کمپنی نیٹ ڈی گیررز بین الاشعبہ جات سرمایہ کاری کے حوالے سے اپنا ثانی نہیں رکھتی۔
یہ کمپنی مختلف صنعتوں کے ماہرین کی فراہمی کے ساتھ ساتھ پورٹفولیو سرمایہ کاری کی خدمات مہیا کرتی ہے۔ سپینش کمپنی کے سی ای او ایڈورڈ نوارو نے اس موقع پر گفتگو کرتے ہوئے کہا کہ پنجاب کے دورہ کے دوران ان کی پاکستان کے بارے میں رائے بالکل تبدیل ہو گئی ہے۔ یہاں کے لوگ انتہائی محنت کش ، مہمان نواز اور خوش مزاج ہیں جبکہ بیرونی دنیا میں ان کا بالکل مختلف اور مسخ شدہ تاثر پیش کیا جاتا ہے ۔ ان کا کہنا تھا کہ پاکستان اور خاص طور پر پنجاب میں سرمایہ کاری کے بے پناہ مواقع موجود ہیں اور ان سے فائدہ اٹھانے کیلئے عالمی سرمایہ کاروں کو یہاں کا دورہ کرکے سرمایہ کاری کے بہترین مواقع کیش کرنے چاہئیں۔ پنجاب بورڈ برائے سرمایہ کاری و تجارت کے سربراہ جہانزیب برانہ نے کہا کہ سرمایہ کاری بورڈ بین الاقوامی سرمایہ کاروں کی سہولت اور مدد کیلئے ہر وقت موجود ہے ۔