اپنی سالگرہ کی تقریب سجانے والا فنانس کمپنی کا مالک کورونا سے چل بسا، پارٹی کی وجہ سے کتنے نامی گرامی لوگ کورونا میں مبتلا ہوگئے؟
حیدر آباد (ڈیلی پاکستان آن لائن) بھارتی ریاست تلنگانہ کے دارالحکومت حیدر آباد میں ایک فنانس کمپنی کے مالک نے سالگرہ پارٹی رکھی جس کے کچھ ہی روز بعد وہ کورونا سے چل بسا، پارٹی میں شریک ہونے والے کئی نامی گرامی لوگ بھی کورونا کی لپیٹ میں آگئے۔
فنانس کمپنی کے مالک پرسن چند بھنڈاری نے 22 جون کو اپنی 63 ویں سالگرہ منائی، تقریب میں 100 سے زائد ہائی کلاس مہمانوں نے شرکت کی۔ پارٹی کے بعد پرسن چند کا کورونا ٹیسٹ مثبت آگیا اور یکم جولائی کو وہ دنیا سے چل بسے۔
میزبان کا کورونا ٹیسٹ مثبت آنے پر پارٹی میں شریک تمام لوگوں نے اپنے ٹیسٹ کرائے جن میں سے 20 کے ٹیسٹ مثبت آگئے۔ کورونا سے متاثر ہونے والوں میں تلنگانہ کی قانون ساز اسمبلی کے ڈپٹی سپیکر پدما راؤ اور معروف جیولر جتندر راج بھی شامل ہیں۔
پدما راؤ ٹیسٹ مثبت آنے کے بعد سے اپنے گھر میں آئسولیٹ ہیں جبکہ جیولر جتندر راج کورونا سے انتقال کرگئے۔ تحقیقات میں سامنے آیا کہ پارٹی کے شرکا کیلئے کھانا پکانے والے افراد کورونا میں مبتلا تھے جس کی وجہ سے لوگ اس وبا سے متاثر ہوئے۔