سٹیٹ بینک کی نئے کرنسی نوٹوں کے لیے ایس ایم ایس سروس دوبارہ شروع
کراچی (آن لائن)بینک دولت پاکستان نے 2015ءکی عیدین کے موقع پر پرجوش خیرمقدم کیے جانے کے بعد اس سال بھی عوام کو نئے کرنسی نوٹوں کے اجرا کے لیے ایس بی پی بینکنگ سروسز کارپوریشن کے ذریعے ایس ایم ایس سروس دوبارہ شروع کر دی ہے۔نئے نوٹ کمرشل بینکوں کی نامزد شاخوں سے دستیاب ہوں گے، جن کو ’ ای برانچز ‘ کہا جائے گا۔ اس کے علاوہ ایس بی پی بی ایس سی کے 16 فیلڈ دفاتر سے بھی نئے کرنسی نوٹ حاصل کیے جا سکیں گے۔ عوام کو موبائل ایس ایم ایس سروس کے ذریعے کمرشل بینکوں کی نامزد ’ای برانچز‘ سے نئے نوٹوں کا اجرا 2 رمضان سے شروع ہوگا اور 28 رمضان تک جاری رہے گا۔ رمضان 2016 کے دوران ملک کے 116 شہروں میں 500 ’ ای برانچز ‘ کے ذریعے یہ خدمت فراہم کی جائے گی۔ نامزد ’ ای برانچز ‘ میں نئے بینک نوٹوں کا ضروری اسٹاک پہنچا دیا گیا ہے۔ ایک ایس ایم ایس پر چارجز 2 روپے جمع ٹیکس ہوں گے۔اس سہولت کے تحت نئے نوٹ حاصل کرنے کے خواہش مند فرد کو شارٹ کوڈ 8877پر ایک ایس ایم ایس پیغام بھیجنا ہوگا جس میں اسے اپنا کمپیوٹرائزڈ شناختی کارڈ یا اسمارٹ کارڈ نمبر اور مطلوبہ ’ای برانچ ‘ کا کوڈ لکھنا ہوگا ، مثال کے طور پر
KHI005(Space)3830305939875 نامزد ای برانچوں کے برانچ کوڈ اسٹیٹ بینک کی ویب سائٹ sbp.org.pk، pakistanbanks.org اور کمرشل بینکوں کی ویب سائٹ پر دستیاب ہیں۔ بھیجنے والے فرد کو جواب میں ایک ایس ایم ایس موصول ہوگا جس میں اس کا ریڈیمشن کوڈ، ای برانچ کا پتہ اور ریڈیمشن کوڈ کے مﺅثر ہونے کی آخری تاریخ لکھی ہوگی۔ ریڈیمشن کوڈ زیادہ سے زیادہ دو ایام کار کے لیے مﺅثرہوگا۔ صارف کو اپنا اصل کمپیوٹرائزڈ شناختی کارڈ/ اسمارٹ کارڈ، اس کی فوٹو کاپی اور 8877سے موصولہ ریڈیمشن کوڈ لے کر متعلقہ ای برانچ جانا ہوگا جہاں سے نئے نوٹ مل جائیں گے۔واضح رہے کہ نئے نوٹوں کا فی کس کوٹا 10روپے کی دو گڈی ، اور 20 روپے کی ایک گڈی ہے جبکہ برانچ میں دستیابی کی صورت میں 50 روپے اور 100روپے کے نوٹوں کی بھی ایک ایک گڈی مل سکتی ہے۔
ایک شناختی کارڈ/اسمارٹ کارڈ نمبر اور موبائل فون نمبر صرف ایک مرتبہ استعمال کیا جا سکتا ہے۔ کسی مختلف موبائل فون نمبر سے وہی سی این ا?ئی سی/ اسمارٹ کارڈ نمبر، یا اسی موبائل فون نمبر سے کوئی اور سی این آئی سی/ اسمارٹ کارڈ نمبر بھیجا گیا تو کوئی ٹرانزیکشن کوڈ جاری نہیں کیا جائے گا، بلکہ بھیجنے والے صارف کو اضافی لاگت ہی اٹھانی پڑے گی۔ عوام کو معلومات /شکایات کی صورت میں مدد دینے کے لیے ایس بی پی بی ایس سی نے ایک ہیلپ ڈیسک 111-008-877 قائم کی ہے جس سے نیشن وائڈ ڈائلنگ کوڈ کے ذریعے رابطہ اس طرح ممکن ہے: پنجاب کے لیے 042 کوڈ، سندھ اور بلوچستان کے لیے 021 کوڈ، اور خیبر پختونخوا، آزاد کشمیر اور گلگت بلتستان کے لیے 051 کوڈ۔ ہیلپ ڈیسک کی سہولت صرف دفتری اوقات میں میسر ہو گی۔
