پرویز مشرف کا عید الفطر کے بعد پاکستان واپسی کا فیصلہ ،حتمی تاریخ کا اعلان سپریم کورٹ فیصلے کے بعد ہو گا: ڈاکٹر محمد امجد 

پرویز مشرف کا عید الفطر کے بعد پاکستان واپسی کا فیصلہ ،حتمی تاریخ کا اعلان ...
پرویز مشرف کا عید الفطر کے بعد پاکستان واپسی کا فیصلہ ،حتمی تاریخ کا اعلان سپریم کورٹ فیصلے کے بعد ہو گا: ڈاکٹر محمد امجد 

اسلام آباد (این این آئی) آل پاکستان مسلم لیگ کے سربراہ جنرل(ر) پرویز مشرف نے عید الفطر کے بعد پاکستان واپسی کا فیصلہ کر لیا ہے،حتمی تاریخ کا اعلان نااہلی کے خلاف اپیل میں سپریم کورٹ کے فیصلے کے بعد ہو گا،پرویز مشرف آئندہ انتخابات میں چار حلقوں سے الیکشن میں حصہ لیں گے،اگر سپریم کورٹ کا فیصلہ خلاف آیا تب بھی پرویز مشرف پاکستان آئیں گے اور پارٹی کے لئے انتخابی مہم کی قیادت کریں گے،اے پی ایم ایل سیٹ ایڈجسٹمنٹ کے تحت اتحادی جماعتوں کے ساتھ الیکشن میں حصہ لے گی،آئندہ ایک دو روز میں ملک بھر سے پارٹی امیدواروں کا حتمی اعلان کر دیا جائے گا۔

تفصیلات کے مطابق  اے پی ایم ایل کے سیکرٹری جنرل ڈاکٹر محمد امجد نے اسلام آباد میں پریس کانفرنس کرتے ہوئےبتایا کہ یکم جون کو دبئی میں پرویز مشرف کی سربراہی میں پارٹی کی کور کمیٹی کااجلاس ہوا جس میں فیصلہ کیا گیا کہ آل پاکستان مسلم لیگ ملک بھر سے انتخابات میں حصہ لے گی اور اہلیت کی بنیاد پر ٹکٹیں دی جائیں گی،پرویز مشرف الیکشن 2018ء میں قومی اسمبلی کے چار حلقوں چترال I ، جھنگ ، گوادر اور کراچی سے الیکشن لڑیں گے،الائنس کا کوئی انتخابی نشان نہیں تھا اس لئے یہ طے پایا ہے کہ آل پاکستان مسلم لیگ اتحادی جماعتوں کے ساتھ جہاں ضروری ہوا وہاں سیٹ ایڈجسٹمنٹ کرے گی، تمام اتحادی جماعتیں اپنے اپنے انتخابی نشان کے تحت الیکشن میں حصہ لیں گی۔ انہوں نے کہا کہ جمعرات کو سپریم کورٹ پرویز مشرف کی جانب سے تاحیات نااہلی کے خلاف اپیل کا فیصلہ سنائے گی ، 3 نومبر کو ایمرجنسی کے نفاذ کی بنیاد پر پرویز مشرف کو تاحیات نااہل قرار دیا گیا تھا جبکہ اس مقدمہ کا ابھی فیصلہ نہیں آیا ، توقع ہے سپریم کورٹ ہمارے ساتھ انصاف کرے گی۔ ڈاکٹر محمد امجد نے بتایا کہ پرویز مشرف عید کے فوراً بعد پاکستان آئیں گے اور اسلام آباد میں اتریں گے تاہم حتمی تاریخ کا اعلان سپریم کورٹ کے فیصلے کے بعد کیا جائے گا۔ انہوں نے کہا کہ اگر سپریم کورٹ سے نااہلی کیس کا فیصلہ ہمارے خلاف آیا تب بھی پرویز مشرف پاکستان آئیں گے اور انتخابات میں پارٹی کی قیادت کریں گے۔ ایک سوال کے جواب میں ڈاکٹر محمد امجد نے کہا کہ آل پاکستان مسلم لیگ سیاسی عمل کے ذریعے سسٹم کا حصہ بننا چاہتی ہے ، غیر سیاسی عمل پر ہمیں یقین نہیں ، پرویز مشرف کو آئندہ ملک کا صدر بنانے کی ڈیل کی باتیں درست نہیں ہیں۔ 

مزید : علاقائی /اسلام آباد

لائیو ٹی وی نشریات دیکھنے کے لیے ویب سائٹ پر ”لائیو ٹی وی “ کے آپشن یا یہاں کلک کریں۔


loading...