انسدادکورونا ویکسین پر سازشی خیالات انتہائی احمقانہ، بل گیٹس

  انسدادکورونا ویکسین پر سازشی خیالات انتہائی احمقانہ، بل گیٹس

  

نیویارک(این این آئی) مائیکروسافٹ کے بانی بل گیٹس نے ان سازشی خیالات کی تردید کی ہے کہ وہ کورونا وائرس کی ویکسین کو لوگوں کے اندر ٹریکنگ مائیکرو چپ لگانے کیلئے استعمال کیا جا رہا ہے۔میڈیارپورٹس کے مطابق صحافیوں سے بات کرتے ہوئے انہوں نے کہا میں کبھی بھی مائیکرو چپ جیسے منصوبوں کا حصہ نہیں رہا، درحقیقت اس کی تردید کرنا بھی بہت مشکل ہے کیونکہ یہ انتہائی احمقانہ یا عجیب ہے۔بل گیٹس کی جانب سے برسوں سے کسی بیماری کی وباء کے حوالے سے خبردار کیا جارہا تھا اور 2016 میں صدر بننے سے پہلے ڈونلڈ ٹرمپ پر بھی اس حوالے سے تیار رہنے پر زور دیا گیا تھا۔ بل گیٹس نے کہا یہ جاننا بہتر ہے کہ کن بچوں کو خسرے کی ویکسین دی گئی اور کن کو نہیں، ایسے نظام جیسے طبی ریکارڈ کو ترتیب دینے کی ضرورت ہے جو مدد فراہم کرسکیں، طبی عملے کو یہ شناخت کرنا ہوگی کہ کون وائرس سے محفوظ ہے مگر اس عمل میں کسی مائیکرو چپ کو شامل کرنے کی ضرورت نہیں۔ ہماری فاؤنڈیشن ویکسینزز خریدنے کیلئے سرمایہ حاصل کرتی ہے اور یہی وجہ ہے کہ ہم نے ایک وباء کے خطرے کو دیکھا اور اس پر بات کی۔بل گیٹس نے زور دیا کہ جب ویکسینز کی تیاری شروع ہوجائیگی تو انہیں سب سے پہلے ان ممالک میں تقسیم کیا جانا چاہیے جن کا طبی نظام کمزور ہے جبکہ سماجی دوری کا خیال رکھنا مشکل ہے۔بل گیٹس کا کہنا تھا دنیا کو محفوظ اور موثر ویکسینز کی تیاری کیلئے ملکر کام کرنے کی کوشش کرنے کی ضرورت ہے اور اس بات کو یقینی بنانا ہوگا کہ اس کی تیاری کا عمل بڑے پیمانے پر ہو، تاکہ ان کو ایسے افراد کیلئے فراہم کیا جاسکے جن کو اس کی ضرورت سب سے زیادہ ہے، ضروری نہیں کہ ان کو پہلے فراہم کی جائے جو سب سے زیادہ سرمایہ لگائیں گے۔

بل گیٹس

مزید :

صفحہ اول -