"اب پاکستان مخالف کردار نہ دئیے جائیں، میں تھک چکا ہوں"، شمعون عباسی

  کراچی(ڈیلی پاکستان آن لائن) اداکار شمعون عباسی کا کہنا ہے کہ "وہ فلموں میں پاکستان مخالف کردار ادا کر کے تھک چکے ہیں۔"

تفصیلات کے مطابق  ایک انٹرویو میں شمعون عباسی کا کہنا تھا کہ "فلمسازوں اور پروڈیوسرز سے درخواست کرتا ہوں کہ اب پاکستان مخالف کردار نہ دئیے جائیں کیونکہ ایسے کردار ادا کرکے تھک چکا ہوں۔اتنے منفی کردار ادا کیے ہیں کہ اب تو بعض اداروں سے بھی فون آنے لگے ہیں۔"

شمعون عباسی نے ایک سوال کے جواب میں تصدیق کی کہ "معروف گلوکار عاطف اسلم اور اداکارہ نیلم منیر کوانہوں نے  متعارف کرایا تھا جبکہ ہمایوں سعید کی کامیابی میں بھی ان کا کردار رہا ہے،اصل میں وہ لکھاری اور ہدایت کار ہی ہیں لیکن نئی نسل انہیں بطور اداکار جانتی ہے،بھارتی جاسوس کلبھوشن یادیو پر بنائی گئی ان کی آنے والی فلم ’ڈھائی چال‘ کی شوٹنگ مکمل ہوچکی اب اس کی ریلیز کا انتظار ہے جس کے لیے کچھ اداروں کی اجازت درکار ہے۔"

اداکارہ میرا سے متعلق شمعون عباسی نے کہا کہ" میرا  کوئی ڈرامے بازی نہیں کرتیں  وہ جیسی ہیں، ویسی ہی باتیں کرتی ہیں۔ ان سے متعلق بعض لوگ غلط باتیں بھی پھیلاتے ہیں۔"