وکلاء تک رسائی نہ دینے اور قید تنہائی کا بیان، حکومت عمران خان کے سیل کی تصاویر سامنے لے آئی

اسلام آباد(ڈیلی پاکستان آن لائن )وفاقی حکومت نے نیب ترامیم کیس میں بانی پی ٹی آئی عمران خان کی جانب سے وکلاء تک رسائی نہ دینے کے بیان کی تردید کردی۔ 
وفاقی حکومت نے بانی پی ٹی آئی عمران خان کے مؤقف کی تردید میں اضافی دستاویزات عدالت میں جمع کروا دیں، ان دستاویزات کے ساتھ عمران خان کی اڈیالہ جیل میں وکلاء سے ملاقات کی تصاویر بھی شامل ہیں۔ حکام کے مطابق بانی پی ٹی آئی کا قید تنہائی میں ہونے کا مؤقف بھی غلط ہے، ان سے ملاقات کرنے والوں کی فہرست بھی سپریم کورٹ میں جمع کروادی گئی ہے۔

 حکومت کا کہنا ہے کہ بانی پی ٹی آئی نے سپریم کورٹ میں وکلاءتک رسائی نہ دینے کا مؤقف اپنایا، عدالت مناسب سمجھے تو ان کے بیان کی حقیقت جانچنے کےلئے کمیشن بھی مقرر کرسکتی ہے۔عمران خان کو ایئر کولر، ٹی وی، سٹڈی ٹیبل، آفس کرسی، میٹریس، ڈرائی فروٹس، چنے بادام، کولڈڈرنکس، چاکلیٹس اور کتابیں بھی دی گئی ہیں،حکومت نمائندگان کے مطابق بانی پی ٹی آئی کو جیل میں کتابیں، ایئرکولر اور ٹی وی سمیت تمام ضروری سہولیات فراہم کی گئی ہیں۔ حکومت کی جانب سے عدالت میں دی جانے والی تصاویر میں دیکھا جاسکتا ہے کہ عمران خان کے کمرے میں ایئر کولر، ایل ای ڈی، سٹڈی ٹیبل، آفس کرسی اور میٹریس کی سہولت موجود ہے جبکہ انہیں ورزش کی مشین بھی فراہم کی گئی ہے۔اس کے علاوہ بانی پی ٹی آئی کے سیل کے باہر ایک راہداری ہے جہاں انہیں واک کرنے کی سہولت میسر ہے جبکہ ان کے پاس ڈرائی فروٹس، چنے، بادام، کولڈڈرنکس، چاکلیٹ اور کتابیں بھی موجود ہیں۔