ملتان سلطانز اور کراچی کنگز کا میچ بارش کی نذر ہو گیا، دونوں ٹیموں کو ایک ایک پوائنٹ مل گیا
لاہور (ڈیلی پاکستان آن لائن) پاکستان سپر لیگ (پی ایس ایل) میں کراچی کنگز اور ملتان سلطانز کا میچ بارش کے باعث منسوخ کرتے ہوئے دونوں ٹیموں کو ایک، ایک پوائنٹ دیدیا گیا ہے۔ بارش سے قبل ملتان سلطانز کی ٹیم کی بیٹنگ جاری تھی تاہم 16.5 اوورز کا کھیل ہی ممکن ہو سکا جس دوران ملتان کی ٹیم نے6 وکٹوں کے نقصان پر 102 رنز بنائے تھے۔
تفصیلات کے مطابق قذافی سٹیڈیم لاہور میں کھیلے گئے میچ میں کراچی کنگز کے کپتان عماد وسیم نے ٹاس جیت کر ملتان سلطانز کو بیٹنگ کی دعوت دی تو اوپننگ جوڑی معین علی اور ذیشان اشرف نے اننگز کا آغاز کیا اور پہلی وکٹ کی شراکت میں 17 رنز بنائے تاہم اس موقع پر ذیشان اشرف صرف 2 رنز بنا کر پویلین لوٹ گئے۔ معین علی نے جارحانہ بلے بازی کرتے ہوئے پاور پلے میں بڑا سکور کرنے کی کوشش کی اور 22 گیندوں پر 1 چھکے اور 2 چوکوں کی مدد سے 29 رنز کی اننگز بھی کھیلی تاہم 37 کے مجموعی سکور پر وہ بھی عامر یامین کا شکار بن گئے۔
یامر یامین نے عمدہ باﺅلنگ کرتے ہوئے اگلی ہی گیند پر ملتان سلطانز کے خطرناک بلے باز ریلی روسو کو بھی پویلین کی راہ دکھا دی تاہم وہ ہیٹ ٹرک کرنے میں ناکام رہے، ریلی روسو کوئی سکور بنائے بغیر ہی آﺅٹ ہو گئے۔ ملتان سلطانز کو اگلا نقصان کپتان عماد وسیم نے پہنچایا اور پہلی ہی گیند پر چوکا لگانے والے روی بوپارا کو بھی پویلین کی راہ دکھا دی، انہوں نے صرف 4 رنز بنائے۔ ملتان سلطانز کے کپتان شان مسعود بھی کراچی کنگز کے باﺅلرز کے سامنے بے بس نظر آئے اور صرف 9 رنز بنا کر عماد وسیم کی گیند پر کلین بولڈ ہو گئے۔ 64 کے مجموعی سکور پر خوشدل شاہ بھی ہمت ہار بیٹھے اور 16 گیندوں پر 8 رنز بنا کر عمر خان کی گیند پر کرس جورڈن کے ہاتھوں کیچ ہو گئے۔ شاہد خان آفریدی نے دھواں دار اننگز کھیلتے ہوئے 17 گیندوں پر 3 چھکوں اور 1 چوکے کی مدد سے 35 رنز بنا کر مجموعی سکور 102 پر پہنچا دیا تاہم اس موقع پر بارش کے باعث میچ روک دیا گیا جو بالآخر منسوخ کر دیا گیا ہے۔
کراچی کنگز کی جانب سے عماد وسیم سب سے کامیاب باﺅلر رہے جنہوں نے 4 اوورز میں 14 رنز کے عوض 2 وکٹیں حاصل کیں اور عامر یامین نے بھی دو کھلاڑیوں کو پویلین کی راہ دکھائی جبکہ محمد عامر اور عمر خان نے ایک، ایک وکٹ حاصل کی۔
واضح رہے کہ میچ کیلئے کراچی کنگز کی قیادت عماد وسیم نے کی جبکہ دیگر کھلاڑیوں میں شرجیل خان، بابراعظم، ایلکس ہیلز، شیڈوک والٹن، افتخار احمد، کرس جورڈن، عامر یامین، محمد عامر، مچل میکلینیگن اور عمر خان شامل ہیں۔
ملتان سلطانز کی قیادت شان مسعود نے کی جبکہ دیگر کھلاڑیوں میں ریلی روسو، معین علی، روی بوپارا، عمران طاہر، محمد عرفان، محمد الیاس، خوشدل شاہ، شاہد آفریدی، سہیل تنویر اور ذیشان اشرف شامل ہیں۔
