بدنام کرنے والوں کو بخشوں گی نہیں‘ اداکارہ میرا
لاہور (این این آئی) فلم سٹار میرا نے کہا ہے کہ جو لوگ مجھے بدنام کر رہے ہیں ان کو نہیں بخشوں گی‘ ان کے خلاف قانونی چارہ جوئی کیلئے اپنے وکلاء کو حکمت عملی بنانے کی ہدایت کر دی ہے ۔مجھے بدنام کرنے والے دراصل شوبز اور فلم انڈسٹری کے دشمن ہیں جن کو میں کامیاب نہیں ہونے دوں گی۔اپنے ایک انٹرویو کے دوران اداکارہ میرا نے کہاکہ جو لوگ مجھے بدنام کر رہے ہیں ان کو کسی بھی صورت معاف نہیں کروں گی اورمیں نے ان کو عدالتوں میں لے جانے کا فیصلہ کیا ہے اور اپنے وکلا کو ہدایت کی ہے کہ وہ ایسے لوگوں کے خلاف عدالت سے رجوع کیلئے حکمت عملی تیار کریں تاکہ ہم ان کے خلاف آئین و قانون کے مطابق کارروائی کرسکیں۔