کراچی میں نقل کیلئے واٹس ایپ کو استعمال کیا جارہاہے ،جس میں بھارتی نمبر موجود ہیں:وزیرتعلیم سندھ جام مہتاب کا دعویٰ
کراچی(ڈیلی پاکستا ن آن لائن )سندھ میں انٹر میڈیٹ کے امتحانات میں نقل کے تانے بانے بھارت سے ملنے لگے ،سندھ کے وزیر تعلیم جام مہتاب نے انکشاف کیاہے کہ کراچی میں نقل کیلئے واٹس ایپ کو استعمال کیا جارہاہے ،جس میں بھارتی نمبر موجود ہیں ۔
نجی ٹی وی اے آر وائے نیوز کے مطابق ،وزیر تعلیم سندھ جام مہتاب کا کہنا ہے کراچی میں نقل کے لیے واٹس ایپ کو استعمال کیا جا رہا ہے جس میں بھارتی نمبرز موجود ہیں، نقل کی روک تھام کے لئے ایف آئی اے،سی ٹی ڈی سے رابطہ کیا ہے،بھارتی نمبر کی موجودگی پر تحقیقاتی اداروں نے انکوائری شروع کردی۔
واضح رہے سندھ میں انٹرمیڈیٹ کا امتحان شروع ہوتے ہی نقل کا میدان جم گیا تھا،کراچی سمیت سندھ کے مختلف علاقوں میں طلبا وطالبات کھلے عام نقل کرنے میں مصروف ہیں جس میں موبائل سمیت کتابوں کا استعمال کیا جا رہا ہے،کسی طالبعلم نے بذریعہ ایس ایم ایس جواب حاصل کیا اور کہیں کتابیں ، گائیڈز اور پھرے چلتے رہے۔
