نامور اداکار اور کامیڈین سکندر صنم کو بچھڑے 6 برس بیت گئے

نامور اداکار اور کامیڈین سکندر صنم کو بچھڑے 6 برس بیت گئے

لاہور(فلم رپورٹر)پاکستانی کامیڈین اور سٹیج کے نامور اداکار سکندر صنم کو ہم سے بچھڑے 6 برس بیت گئے۔غریب گھرانے میں آنکھ کھولنے والے سکندر صنم نے گھریلو حالات کے باعث بہت کم عمری میں ایک فیکٹری میں مزدوری شروع کی تاہم بعد ازاں انہیں اپنے اندر چھپی صلاحیتیں دکھیں اور انہوں نے شوبز کا انتخاب کیا۔کراچی کے علاقے کھارادر میں 1960ء میں پیدا ہونے والے سکندر صنم نے 1981ء میں سٹیج کی دنیا میں قدم رکھا اور پھر آخری ایام تک اْسی سے وابستہ رہے، آپ نے کیرئیر کا آغاز بطور گلوکارکیا تاہم عمرشریف سے دوستی ہونے کے بعد دونوں فنکاروں نے مختلف تقریبات میں اسٹیج کامیڈی کا آغاز کیا۔دومسخروں کی اس جوڑی سے لوگ اتنا محظوظ ہوئے کہ اگر کسی ڈرامے میں کوئی ایک فرد کم ہوتا توعوام کی دلچسپی اْس میں کم ہی ہوتی۔

سکندر صنم نہ صرف پاکستان بلکہ دنیا بھر میں اپنے فن کی وجہ سے پہچانے جانے لگے۔سکندر صنم کو اْس وقت زیادہ پذیرائی ملی جب انہوں نے بھارتی فلموں کی پیروڈی کو مزاحیہ انداز میں تیار کیا جن میں کھل نائیک، تیرے نام 2، گجنی 2، منا بھائی وغیرہ جیسی فلمیں بنائیں اور لوگوں کو ہنسنے کا موقع فراہم کیا۔دنیا بھر میں غموں کو دور اور اْن میں مسکراہٹیں بانٹنے والا یہ فنکار جگر کے کینسر میں مبتلا ہوا اور5 نومبر 2012 کو مداحوں کی آنکھوں میں آنسو چھوڑ گیا۔

مزید : کلچر