بیرون ملک مقیم پاکستانیوں کی بڑی پریشانی حل، سٹیٹ بینک نے بائیو میٹرک تصدیق کیلئے نئی ہدایات جاری کردیں

بیرون ملک مقیم پاکستانیوں کی بڑی پریشانی حل، سٹیٹ بینک نے بائیو میٹرک تصدیق ...
بیرون ملک مقیم پاکستانیوں کی بڑی پریشانی حل، سٹیٹ بینک نے بائیو میٹرک تصدیق کیلئے نئی ہدایات جاری کردیں

  



اسلام آباد (ویب ڈیسک) سٹیٹ بینک آف پاکستان نے بیرون ملک مقیم پاکستانیوں کے بینک اکاﺅنٹس کی تصدیق میں درپیش مشکلات کے حل کے لیے متبادل ہدایات جاری کردی ہیں، جس کے بعد ایسے تمام افراد جو بائیو میٹرک تصدیق کے لیے ملک میں موجود نہیں وہ دیگر دستاویزات آن لائن جمع کروا کر پاکستان میں موجود اپنے اکاﺅنٹس کی تصدیق کرواسکتے ہیں۔

روزنامہ جنگ کی رپورٹ کے مطابق یہ متبادل انتظام نوکری کی غرض سے ملک سے باہر مقیم پاکستانیوں کو رقم کی منتقلی اور ملک میں ان کے بینک اکاﺅنٹ کی معطلی کے حوالے سے موصول شکایات کو مدنظر رکھتے ہوئے کیا گیا ہے۔ سٹیٹ بینک نے اس حوالے سے تمام بینکوں کو ہدایات بھی جاری کر دی ہیں۔بینک دولت پاکستان کی جانب سے جاری کردہ اعلامیے کے مطابق مذکورہ متبادل نظام کے تحت بیرون ملک مقیم خواتین و حضرات اپنے متعلقہ بینک سے بذریعہ ای میل/عام ڈاک رابطہ کرکے اپنی شناختی دستاویزات (پاسپورٹ، ویزا، شناختی کارڈ) فراہم کریں۔ان دستاویزات کو بائیومیٹرک تصدیق کے متبادل کے طور پر استعمال کیا جائے گا۔

اکاﺅنٹ کی تصدیق کے بعد بیرون ملک مقیم پاکستانی اپنے بینک اکاﺅنٹ کو بنا کسی روک ٹوک استعمال کرسکیں گے۔اس حوالے سے سٹیٹ بینک نے تصدیق کی شرائط اور ضابطہ کار بھی واضح کردیا ہے جس کے تحت بینک اکاﺅنٹ ہولڈرز کو تین درجات میں تقسیم کیا گیا ہے، غیر مقیم پاکستانی، عارضی طور پر باہر مقیم پاکستانی اور مشترکہ اکاﺅنٹ ہولڈرز۔

ڈائریکٹر سٹیٹ بینک محمد اختر جاوید کی طرف سے فراہم کردہ تفصیلات کے مطابق غیر مقیم پاکستانیوں کو بینک اکاﺅنٹ کی تصدیق کے لیے مندرجہ ذیل دستاویزات بھجوانا ہوں گی۔

1۔ صارف کےغیر مقیم پاکستانی ہونے کی تصدیق بذریعہ موثر پاسپورٹ، ویزا، رہائشی پرمٹ یا دیگر مصدقہ دستاویزات

2۔ شناختی کارڈ یا نائکوپ کی کاپی

3۔ متعلقہ بینک کا اکاﺅنٹ نمبر

4۔ صارف کی جانب سے رہائشی اسٹیٹس تبدیل ہونے کی صورت میں بینک کو مطلع کرنے کا تصدیق نامہ

فراہم کردہ معلومات کو مدنظر رکھتے ہوئے مجوزہ بینک نادرا کے ذریعے تصدیق کرے گا۔وہ تمام افراد جو بیرون ملک مقیم پاکستانی تو نہیں مگر عارضی طور پر ملک سے باہر رہائش پذیر ہیں انہیں ملک میں نہ ہونے کا قابل قبول ثبوت فراہم کرنا ہوگا۔ معلومات کی فراہمی کے بعد متعلقہ بینک نادرا کے سسٹم کے ذریعے تصدیق کا عمل مکمل کرے گا جو بائیو میٹرک تصدیق کا متبادل ہوگا۔

یہاں یہ بات قابلِ ذکر ہے کہ متبادل تصدیق کا یہ عمل صرف اس وقت تک قابلِ عمل ہوگا جب تک صارف ملک سے باہر ہے، ملک واپسی کی صورت میں صارف کو فوری طور پر بائیو میٹرک تصدیق کروانا ہوگی۔مشترکہ اکاﺅنٹ کی صورت میں پاکستان میں مقیم شہری کی بائیو میٹرک تصدیق کی جائے گی جبکہ ملک سے باہر مقیم شہری کی رہائشی صورت کو مدنظر رکھتے ہوئے مندرجہ بالا طریقے سے متبادل تصدیق کی جائے گی۔

سٹیٹ بینک کی جانب سے اینٹی منی لانڈرنگ اور کاﺅنٹر فائنانسنگ آف ٹیررازم کے سلسلے میں کیے گئے اقدامات کے تحت تمام بینک اکاﺅنٹس کی بائیو میٹرک تصدیق لازم قرار دی گئی ہے اور تصدیق نہ کروانے کی صورت میں اکاﺅنٹ معطل کیا جا رہا ہے۔ تاہم ملازمت کی غرض سے ملک سے باہر مقیم پاکستانیوں کو اس حوالے سے مشکلات درپیش آرہی تھیں کیونکہ ملک میں موجود نہ ہونے کی وجہ سے ان کے اکاﺅنٹ معطل ہورہے تھے اور انہیں پاکستان رقم بھیجنے میں بھی مشکلات کا سامنا ہے۔ بینک دولت پاکستان کا متبادل نظام ملک سے باہر مقیم پاکستانیوں کی مشکلات میں آسانی پیداکرے گا۔

مزید : علاقائی /اسلام آباد