حقیقی جمہوریت کیلئے شفاف انتخابات ناگزیر، عبوری حکومت قائم کی جائے: پرویز مشرف

کراچی(مانیٹرنگ ڈیسک) سابق فوجی صدر پرویز مشرف نے کہاہے کہ ملک میں حقیقی جمہوریت کے لئے شفاف انتخابات کا انعقاد ناگزیر ہے، انتخابی اصلاحات اور نظام کی بہتری کے لئے فوج سمیت تمام سٹیک ہولڈرز کی مشاورت سے اصلاحات کے آئینی اختیار کے ساتھ عبوری حکومت قائم کی جائے۔
عید الاضحیٰ کے موقع پر اپنے خصوصی پیغام میں پرویز مشرف نے کہا کہ دہشتگردی سے نجات اور مستقل امن کے قیام کے لئے استحصال، کرپشن اور ناانصافی سے نجات ضروری ہے مگر یہ اس وقت تک ممکن نہیں جب تک ملک میں حقیقی جمہوریت نہ ہو اور حقیقی جمہوریت کے لئے شفاف انتخابات کا انعقاد ناگزیر ہے مگر دھونس ، دھاندلی، جوڑ توڑ اور بد معاشوں کے سہارے اقتدار میں آنے والے کبھی ایسا نہیں ہونے دیں گے۔
سابق صدر کا کہنا تھا کہ اصلاحات کے بعد شفاف انتخابات کے ذریعے اقتدار عوام کے منتخب حقیقی نمائندوں کے حوالے کیا جائے تو ملک سے نہ صرف دہشت گردی ،کرپشن اور نا انصافی و استحصال کا خاتمہ ممکن ہے بلکہ جمہوریت کے ثمرات بھی عام پاکستانیوں تک پہنچیں گے۔