سانحہ 12 مئی،میئر کراچی وسیم اختر پر ایک اور مقدمے میں فرد جرم عائد

سانحہ 12 مئی،میئر کراچی وسیم اختر پر ایک اور مقدمے میں فرد جرم عائد
سانحہ 12 مئی،میئر کراچی وسیم اختر پر ایک اور مقدمے میں فرد جرم عائد

  

کراچی(ڈیلی پاکستان آن لائن) انسداد دہشتگردی کی خصوصی عدالت نے سانحہ 12 مئی سے متعلق ایک اور مقدمے میں مئیر کراچی وسیم اختر پر فرد جرم عائد کردی۔

سانحہ 12 مئی کے کیس سے متعلق کراچی کی انسداد دہشت گردی کی خصوصی عدالت میں 4 مزید مقدمات کی سماعت ہوئی جس سلسلے میں میئر کراچی وسیم اختر عدالت میں پیش ہوئے۔انسداد دہشتگردی عدالت نے 12 مئی کیس میں میئر کراچی پر فرد جرم عائد کردی۔

عدالت نے 12 مئی سے متعلق تھانہ ائیرپورٹ کے کیس میں وسیم اختر سمیت دیگر ملزمان پر فرد جرم عائد کردی جبکہ ملزمان نے کمرہ عدالت میں صحت جرم سے انکار کردیا۔عدالت نے آئندہ سماعت پر کیس کے گواہان کو طلب کرتے ہوئے مزید سماعت 27 اکتوبر تک ملتوی کردی۔عدالت میں پیشی کے موقع پر میڈیا سے غیر رسمی گفتگو کرتے ہوئے میئر کراچی وسیم اختر کا کہنا تھا کہ سانحہ 12 مئی کی تحقیقات اور ذمے داران کا تعین ہوناچاہئے۔

واضح رہے کہ عدالت 12 مئی سے متعلق ایک اور مقدمے میں وسیم اختر اور دیگر پر پہلے ہی فرد جرم عائد کرچکی ہے اور کیس میں 9 مفرو ملزمان کو اشتہاری قرار دے چکی ہے۔سندھ ہائیکورٹ کے حکم پر سانحہ کی تحقیقات کےلئے ایڈیشنل آئی جی کراچی امیر شیخ کی سربراہی میں جے آئی ٹی تشکیل دی جاچکی ہے اور عدالت نے جے آئی ٹی کی نگرانی کےلئے نگران جج بھی مقرر کردیا ہے۔

مزید : قومی /علاقائی /سندھ /کراچی