گیروڈی اٹالیہ سائیکل ریس کا تیسرا مرحلہ ایکواڈور کے جوناتھن کیسیڈو نے جیت لیا

گیروڈی اٹالیہ سائیکل ریس کا تیسرا مرحلہ ایکواڈور کے جوناتھن کیسیڈو نے جیت ...
گیروڈی اٹالیہ سائیکل ریس کا تیسرا مرحلہ ایکواڈور کے جوناتھن کیسیڈو نے جیت لیا
کیپشن:    سورس:   Twitter

  

روم (ڈیلی پاکستان آن لائن) ایکواڈور کے سائیکل سوار جوناتھن کیسیڈونے گیرو ڈی اٹالیہ سائیکل ریس کا تیسرا مرحلہ جیت لیا جنہوں نے 150 کلومیٹر کا مقررہ فاصلہ 4 گھنٹے 2 منٹ اور 33 سیکنڈ میں طے کیا۔ 

تفصیلات کے مطابق اٹلی میں گیرو ڈی اٹالیہ کا 103 واں ایڈیشن جاری ہے جس میں سائیکلنگ کی دنیا کے نامور سائیکل سوار ٹائٹل کے حصول کیلئے کوشاں ہیں۔ گیرو ڈی اٹالیہ سائیکل ریس کے تیسرے مرحلے میں سائیکل سواروں نے اینا سے اٹنا تک کا 150 کلومیٹر پر محیط پہاڑی فاصلہ طے کرنا تھا جسے ایکواڈور کے سائیکل سوار جوناتھن کیسیڈو نے عمدہ کارکردگی کا مظاہرہ کرتے ہوئے 4گھنٹے 2منٹ اور 33سیکنڈز میں طے کر کے پہلی پوزیشن حاصل کی۔ 

اٹلی کے سائیکل سوار جیوانی وسکونٹی نے دوسری جبکہ بیلجیئم کے سائیکل سوار ارم وان ہیوک نے تیسری پوزیشن حاصل کی۔گیرو ڈی اٹالیہ ایک گرینڈ ٹور سائیکلنگ سٹیج ریس ہے جو تین ہفتوں میں مکمل ہوگی، ایونٹ کا 103واں ایڈیشن رواں سال 9سے 31مئی تک شیڈول تھا جو کورونا وائرس کی عالمگیر وبا کے باعث اسے ملتوی کر دیا گیا تھا۔

گیرو ڈی اٹالیہ سائیکل ریس 21 مرحلوں پر محیط ہے جس میں سائیکل ریس کی دنیا کے نامور کھلاڑی 22 ٹیموں کی صورت میں شریک ہیں جو مجموعی طور پر 3,495.8 کلو میٹر کا سفر طے کریں گے، یہ سائیکل ریس 23 روز جاری رہنے کے بعد 25 اکتوبر کو اختتام پذیر ہوگی۔ 

مزید :

کھیل -