حیراں ہوں دل کو روؤں کہ پیٹوں جگر کو میں
حیراں ہوں دل کو روؤں کہ پیٹوں جگر کو میں
مقدور ہو تو ساتھ رکھوں نوحہ گر کو میں
چھوڑا نہ رشک نے کہ ترے گھر کا نام لوں
ہر اک سے پوچھتا ہوں کہ جاؤں کدھر کو میں
جانا پڑا رقیب کے در پر ہزار بار
اے کاش جانتا نہ ترے رہگزر کو میں
ہے کیا جو کس کے باندھئے میری بلا ڈرے
کیا جانتا نہیں ہوں تمہاری کمر کو میں
لو وہ بھی کہتے ہیں کہ یہ بے ننگ و نام ہے
یہ جانتا اگر تو لٹاتا نہ گھر کو میں
چلتا ہوں تھوڑی دور ہر اک تیز رو کے ساتھ
پہچانتا نہیں ہوں ابھی راہ بر کو میں
خواہش کو احمقوں نے پرستش دیا قرار
کیا پوجتا ہوں اس بت بیداد گر کو میں
پھر بے خودی میں بھول گیا راہِ کوئے یار
جاتا وگرنہ ایک دن اپنی خبر کو میں
اپنے پہ کر رہا ہوں قیاس اہل دہر کا
سمجھا ہوں دل پذیر متاع ہنر کو میں
غالبؔ خدا کرے کہ سوار سمندِ ناز
دیکھوں علی بہادرِ عالی گہر کو میں
شاعر: مرزا غالب
Hairaan Hun , Dil Ko Roun Keh Peetun Jigar Ko main
Maqdoor Ho To Saath Rakhun Nohagar Ko Main
Chorra Na Rashq Nay Keh Tiray Ghar Ka Naam Lun
Har Aik Say Poochta Hun Keh Jaaun Kidhar Ko Main
Jaana Parra Raqeeb K Ghar Par Hazaar Baar
Ay Kaash Jaanta Na Tiri Rehguzar Ko Main
Hay Kaya Jo Kass K Baandhiay, Meri Balaa Daray
Kaya Jaanta Nahen Hun Tumhaari Kamar Ko Main
Lo Wo Bhi Kehtay hen Keh Ye be Nang o Naam Hay
Yeh Jaanta Agar To Lutaata Na Ghar Ko Main
Chalta Hun Thorri Door Har Ik Taiz Ro K Saath
Pehchaanta Nahen Hun Abhi Raahbar Ko Main
Khaahish Ko Ahmakon Nay Parastish Dia Qaraar
Kaya Poojta Hun Uss Butt e Bedaad Gar Ko Main
Phir Bekhudi Men Bhool Gaya Raah e Koo e Yaar
Jaata Wagarna Aik Din Apni Khabar Ko Main
Apnay Pe Kar Raha Hun Qayaas Ehl e Dehr Ka
Samjha Hun Dilpazeer , Mohtaaj e Hunar Ko Main
GHALIB Khuda Karay Keh Sawaar e Samand e Naaz
Dekhun ALI BAHADUR Aali Gohar Ko Main
Poet: Mirza Ghalib