ملک بھر میں یوم دفاع آج ملی جوش و جذبے سے منایا جائیگا

    اسلام آباد(آئی این پی)ملک بھر میں یوم دفاع پاکستان آج 6ستمبر کو ملی جوش وجذبے اور شہدائے وطن کے ساتھ محبت وعقیدت کے ساتھ منایا جائے گا۔ یوم دفاع کے موقع پر وفاقی دارالحکومت اسلام آباد میں دن کا آغاز 31 اور صوبائی دارالحکومتوں میں 21 توپوں کی سلامی سے ہوگا، نماز فجر کے بعد ملک و قوم کی سلامتی اور خوشحالی کیلئے خصوصی دعائیں اور شہدا کیلئے فاتحہ خوانی کی جائے گی۔یوم دفاع پاکستان کے سلسلے میں تمام کنٹونمنٹس کے ساتھ مختلف شہروں میں پروقار تقاریب کا اہتمام کیا جائے گا۔عسکری و سول افسران 6 ستمبر 1965 کی جنگ میں جام شہادت نوش کرنے اور نشان حیدر پانے والے شہدا کی یادگاروں پر پھول چڑھانے کے علاوہ قرآن خوانی اور فاتحہ خوانی کی جائے گی جبکہ شہداکے اہل خانہ سے بھی ملاقاتیں کریں گی، بانی پاکستان محمد علی جناح اور مفکر پاکستان علامہ محمد اقبال کے مزارات پر گارڈز کی تبدیلی کی پر وقار تقریبات منعقد ہوں گی۔1965میں پاک فوج نے دشمن کی تمام ترچالوں کوناکام بنایا، بزدل دشمنوں کوارض پاک کی طرف میلی آنکھ سے دیکھنے پرسبق سکھایا۔   

یوم دفاع