ٹینس کی تازہ رینکنگ جاری ، رافیل نڈال دو درجے تنزلی کے بعد پانچویں نمبر پر پہنچ گئے

ٹینس کی تازہ رینکنگ جاری ، رافیل نڈال دو درجے تنزلی کے بعد پانچویں نمبر پر ...
ٹینس کی تازہ رینکنگ جاری ، رافیل نڈال دو درجے تنزلی کے بعد پانچویں نمبر پر پہنچ گئے

  

پیرس(یو این پی) ٹینس کی تازہ ترین ورلڈ رینکنگ جاری کر دی گئی ہے جس کے مطابق مردوں میں سربیا کے نوواک جوکووچ اور خواتین میں ا مریکہ کی سرینا ولیمز سرفہرست ہیں،اسپین کے رافیل نڈال دو درجے تنزلی کے ساتھ پانچویں نمبر پر آگئے ہیں۔میامی اوپن کا ٹائٹل جیتنے کے بعد نوواک جوکووچ کی ریٹنگ میں چار ہزار پوائنٹس کا اضافہ ہوا ہے۔ سوئس کھلاڑی راجر فیڈرر دوسرے اور انگلینڈ کے اینڈی مرے تیسرے نمبر پر ہیں۔

 تفصیلات کے مطابق میامی اوپن ٹینس ٹورنامنٹ کے اختتام کے بعد مرد و خواتین پلیئرز کی نئی ورلڈ رینکنگ کا اعلان کر دیا گیا ہے۔ مردوں میں سربیا کے نوواک جوکووچ 13205 پوائنٹس کے ساتھ پہلے نمبر پر براجمان ہیں۔ میامی اوپن میں مینز سنگلز کا ٹائٹل جیتنے کے بعد نوواک جوکووچ کی ریٹنگ میں چار ہزار پوائنٹس کا اضافہ ہوا ہے۔ سوئٹزر لینڈ کے راجر فیڈرر 8895 پوائنٹس کے ساتھ دوسرے اور برطانیہ کے اینڈی مرے 6060پوائنٹس کے ساتھ تیسرے نمبر پر ہیں۔ جاپان کے کائی نشیکوری ایک درجہ ترقی کے ساتھ چوتھے جبکہ اسپین کے رافیل نڈال دو درجے تنزلی کے بعد پانچویں نمبر پر پہنچ گئے ہیں۔

 کینیڈا کے مائیلوس رونیک چھٹے اور ا سپین کے ڈیوڈ فیرر ساتویں نمبر پر ہیں۔ جمہوریہ چیک کے ٹامس برڈیخ ایک درجہ بہتری کے ساتھ آٹھویں جبکہ سوئٹزرلینڈ کے ا سٹینسلاس واورینکا ایک درجہ تنزلی کے ساتھ نویں نمبر پر آگئے ہیں۔ کروشیا کے مرین سلچ دسویں پوزیشن پر برقرار ہیں۔ ویمنز سنگلز کی رینکنگ میں امریکا کی سرینا ولیمز 9981 پوائنٹس کے ساتھ پہلے نمبر ہیں۔ روس کی ماریہ شراپوا دوسرے ، رومانیہ کی سیمونا ہالیپ تیسرے ، جمہوریہ چیک کی پیٹرا کویٹووا چوتھے، ڈنمارک کی کیرولین ووزنیاکی پانچویں، سربیا کی اینا ایوانووچ چھٹے ، کینیڈا کی یوجینی بوکارڈ ساتویں، روس کی ایکٹرینا ماکارووا آٹھویں، پولینڈ کی اگنیسکا رڈوانسکا نویں اور ا سپین کی کارلا سواریز دسویں نمبر پرفائز ہیں۔

مزید : کھیل